Иргэд МӨСӨН ДУНД АМЬДАРЧ БАЙНА, Хотын дарга аа

Б. Бадралмаа:
Монголчуудын амьдрал- Мэдээ мэдээлэл

2020-11-30, 1056

Ес эхлэх дөхөж, жавар тачигнасан энэ өдрүүдэд нийслэлийн Чингэлтэй дүүргийн хэсэг айл өрх мөсөн дунд амьдарч байна гэвэл үзэгч, уншигч та бүхэн итгэх үү. Тэгвэл яг одоо та хашаатайгаа зэрэгцсэн мөсөн дунд, хүн амьдрах нь битгий хэл хэсэг хугацаанд зогсоход ч бэрх нөхцөлд улсын нийслэл Улаанбаатар хотын иргэд амьдарч байгаа дүр зургийг харж байна.

Биднийг Чингэлтэй долдугаар хорооны нутаг буюу Зурагтын шинэ эцэст очиход зам дагуу ус урсаж, зузаан мөс тогтсон байв. Нийслэлийн Засаг дарга бөгөөд Улаанбаатар хотын захирагч Д.Сумъяабазар болон бусад холбогдох албаныхан газар дээр нь ирж, нөхцөл байдалтай танилцаад явжээ. Улмаар техник хэрэгслээр мөсийг нь буталж, булгийн усыг шугам, хоолой руу нь урсгах арга хэмжээг авахыг албаныханд даалгаад явсан байна. Гэвч холбогдох албаныхан нүглийн нүдийг гурилаар хуурна гэгчээр хөлдсөн мөсийг нь замын хажуу руу гаргаж, хүн явахын эцэсгүй болгосон байлаа.

“Булаг задарч, олон айл усанд автлаа. Эд хөрөнгө, эрүүл мэндээрээ хохирч байна” гэх мэдээлэл сүүлийн жилүүдэд нийслэлд тасралтгүй гарсан. Харамсалтай нь, үүнийг хотын удирдлага, хороо дүүргийн дарга нар байдаг үзэгдэл мэтээр хүлээж аваад, дасал болчихжээ. Өвөлдөө хашаатай нь зэрэгцсэн энэ мөс урин цагаар хайлж, өтгөн шингэнтэй нь хутгалдан хүн амьдрахын эцэсгүй болгодог. Тус хорооны иргэд гэхэд л орон гэрээ усанд алдчихгүйн тулд өвлийн хүйтэнд хэдэн өдөр устай ноцолдож, зам дагуулан урсгах арга хэмжээ авсан байна.

Иргэдийн хэлж байгаагаар урьд нь ус урсдаг байсан ч цаг тухай бүрт нь арга хэмжээ авчихдаг байжээ. Уг нь ус урсаж, амьдрах нөхцөл байдал хүндэрдэг талаар иргэд сонгуулийн үеэр нэр дэвшигчдэд удаа дараа хэлж, энэ асуудлыг шийдэж өгөх хүсэлт гаргасан байгаа юм. Тухайн үед “Бид яаралтай арга хэмжээ авч, булаг дахин ундрахааргүй болгож өгнө” хэмээж байсан ч тэр чигтээ алга болцгоосон байна.

Иргэд МӨСӨН ДУНД АМЬДАРЧ БАЙНА, Хотын дарга аа

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.