Архангай аймгийн Батцэнгэл суманд коронавирусийн сэжигтэй тохиолдол бүртгэгдэж, PCR-аар шинжилгээ авахад хариу нь эерэг гарсан талаар бид мэдээлсэн. Мөн халдвар түүний хүүхэд нь илэрсэн байна.

Тухайн иргэн нь энэ сарын 15-нд хүнс тээвэрлэж, сумандаа очжээ. Халдвар илэрсэн жолооч нь  Улаанбаатар хотод батлагдсан тохиолдлын ойрын хавьтал байсан гэдгийг эх сурвалжууд мэдээлж байгаа юм. Ийн халдвар илэрсэн иргэний ойрын болон дам хавьтлыг тогтоох ажил үргэлжилж байгааг Архангай аймгийн онцгой комиссоос мэдээлсэн. Тус аймагт коронавирусийн халдвар илэрсэн нь тогтоогдсон тул Батцэнгэл, Ихтамир суманд хатуу хөл хорионы дэглэм тогтоогоод байгаа.

УОК-оос орон нутгийн иргэдийг арванхоёрдугаар сарын 1-ний 8:00 цагаас эхлэн явуулахаар шийдвэрлээд байсан юм. Харин халдварын голомттой бус нутаг руу явах иргэдийг эхний тав хоногт явуулахгүй хэмээн мэдэгдсэн. Архангай аймагт халдварын хоёр тохиолдол илэрсэн тул тус аймгийн иргэдийг татах эсэх нь тодорхойгүй байна. Энэ талаар УОК шийдвэр гаргаж, аймгийн онцгой комисст чиглэл өгөх аж.