Архангай аймгийн Батцэнгэл суманд коронавирусийн хоёр тохиолдол батлагдлаа. Тодруулбал, аав, хүү хоёрын PCR шинжилгээний хариу эерэг гарчээ. Таван настай хүүгийн аав энэ сарын 15-ны өдөр хүнс тээвэрлэж Архангайд очсон байна. Улмаар хүүдээ халдвар тараасан нь тогтоогджээ. Одоогоор аав, хүү хоёрын ойрын хавьтлуудыг олж тусгаарлах ажлуудыг зохион байгуулж байгаа аж. Өчигдөр Архангай аймгийн Батцэнгэл суманд сэжигтэй тохиолдол бүртгэгдэж, хөл хорио тогтоосон талаар цахим орчинд мэдээлэл гарсан. Тухайн үед тус сумын ЗДТГ-ын дарга Ш.Нэргүйбаатараас тодруулахад "Халдвар илэрсэн хүний ойрын хавьталд орсон байх магадлалтай нэг иргэнийг олсон. ТЕГ-аас мэдээлэл ирсний дагуу тухайн иргэнийг ойрын хавьтал байж магадгүй хэмээн шинжилгээнд хамруулсан" гэх мэдээллийг өгч байсан юм. Мөн тэрбээр "Тус иргэн нь арваннэгдүгэр сарын 15-нд хүнс тээвэрлэж ирсэн нутгийн уугуул иргэн. Сум руу нэвтрэх үед нь асуумж судалгаа авч, халууныг нь хэмжиж нэвтрүүлсэн. Одоо суманд хэсэгчлэн хөл хорио тогтоосон байна" гэсэн юм. Тус жолооч нь Улаанбаатар хотод бүртгэгдсэн халдварын ойрын хавьтал аж. Тодруулбал, дуудлагын бариачийн нэгдүгээр хавьтал гэнэ.