Хэвлэл мэдээллийн суурь боловсролын Дэлхийн долоо хоног жил бүрийн аравдугаар сарын сүүлийн долоо хоногт тохиодог. Энэ өдрийг дэлхий дахинд 2011 оноос хойш тэмдэглэх болсон. Харин Монголд Улсад 2018 оноос хойш ЮНЕСКО-ийн Монголын Үндэсний комиссын дэмжлэгтэйгээр Хэвлэлийн хүрээлэн санаачлан үндэсний хэмжээнд тэмдэглэж эхэлсэн.

       Эв нэгдлийг бий болгох, итгэлцлийг бэхжүүлэх зорилго бүхий энэ удаагийн хэвлэл мэдээлэл, мэдээллийн суурь боловсролын долоо хоногийг “Итгэлцлийг бэхжүүлэх нь: Хэвлэл мэдээлэл, мэдээллийн суурь боловсролын ач холбогдол” уриан дор нэгдэн, Юнескогийн Бээжин дэх төлөөлөгчийн газрын дэмжлэгтэйгээр ЦХХХЯ, ЮНЕСКО-ийн Монголын үндэсний комисс, Хэвлэл мэдээллийн суурь боловсролын үндэсний сүлжээ, Хэвлэлийн хүрээлэн, Faro Foundation, e-mongolia зэрэг байгууллагууд хамтран зохион байгуулж байна.

  Форумыг нээж ЦХХХ-ны сайд Н.Учрал "Иргэдийн мэдээллийг ялгаж таньдаг, шүүн тунгаадаг, эх сурвалжийг нягталдаг дадал, төлөвшлийг бий болгох хэвлэл, мэдээллийн суурь боловсролыг дээшлүүлэх шаардлага үүсэж байгааг нийгмийн сүлжээ, хэвлэлд нийтлэгдэж буй мэдээллийн нийгэмд үзүүлж буй элдэв нөлөөлөл бидэнд сануулж байна. Хэвлэл мэдээллийн боловсролын ур чадвараа хөгжүүлж бэхжүүлэх нь аливаа мэдээлэлд дүн шинжилгээ хийх, дүгнэлт гаргах, хариу арга хэмжээ авах, өөрийгөө болон бусдыг олон нийтэд хор нөлөөтэй мэдээллээс хамгаалахад нэн чухал үүрэгтэй" гэлээ.

            Мөн үндэсний оролцогч талуудын IV форумд төрийн, иргэний нийгмийн, олон улсын байгууллагууд болон хэвлэл мэдээллийн салбарын 100 гаруй төлөөлөгч танхим болон цахимаар оролцон, хэвлэл мэдээлэл, мэдээллийн суурь боловсролын ач холбогдол, хүний эрхийн хүрээнд хэлэлцүүлэг өрнүүлж, мэдээлэл солилцсон юм.