Улаанбаатар хотод хэрэгжүүлэх сүрьеэгийн хавьтлын илрүүлэлт, хяналтыг сайжруулах төсөл хэрэгжиж эхэллээ. Ингэснээр нийслэлийн төвийн зургаан дүүрэгт бүртгэгдсэн сүрьеэтэй өвчтөний хавьтал 0-18 насны хүүхдүүдийг сүрьеэгийн халдвар авсан эсэхийг тодорхойлох өндөр өртөгтэй шинжилгээг үнэ төлбөргүйгээр хийх боломжтой болжээ.

     Шинжилгээгээр хүүхдүүд сүрьеэгийн халдварт өртсөн эсэхийг тодорхойлох, халдвар авсан тохиолдлыг сүрьеэгээр өвчлөхөөс урьдчилан сэргийлэх зорилгоор эмчилгээнд хамруулах юм.

 БНСУ-ын үндэсний сүрьеэгийн нийгэмлэг нь Халдварт өвчин судлалын үндэсний төв хамтран сүрьеэгийн далд халдварын оношилгоог сайжруулах зорилгоор ХӨСҮТ-ийн Сүрьеэгийн үндэсний лавлагаа лабораторийг түшиглэсэн интерферон-гамма тодорхойлох шинжилгээг үндэсний төвийн түвшинд анх удаагаа нэвтрүүлжээ.

"Иргэд өөрсдөө сүрьеэгийн халдвар авсан эсэхээ шинжлүүлээд, хэрэв халдвартай болох нь батлагдвал бактери унтаа байдалд байхад нь далд халдварын эмчилгээг хийлгэж сүрьеэгээр өвдөхгүй байх боломжтой” гэдгийг доктор Э.Оюунчимэг хэлж байв.

  Манай улсад 2021 оны жилийн эцсийн байдлаар сүрьеэгийн нийт тохиолдлын хүүхэд эзлэх хувь 12.3 хувь болж нэмэгджээ. Өөрөөр хэлбэл хүүхдийн сүрьеэгийн өвчлөл 2-3 дахин өндөр байдаг байна.