Австралийн Нийслэлийн бүс нутгийн захиргаа, Канберра дахь дипломат корпустай хамтран зохион байгуулсан “Windows to the World” Элчин сайдын яамдын нээлттэй хаалганы өдөрлөгт Монгол Улсаас Австрали Улсад суугаа Элчин сайдын яам 2022 оны аравдугаар сарын 23-ны Ням гарагт оролцож, өөрийн орны түүх, ёс заншил, өв уламжлал, соёл урлагаа сурталчлан танилцуулах арга хэмжээг зохион байгуулав. ЭСЯ-нд зохион байгуулсан уг арга хэмжээнд 400 гаруй хүн хүрэлцэн ирж, монгол гэрээр зочлон, Монголын тухай богино хэмжээний баримтат кино, гэрэл зургийн үзэсгэлэнг үзэж, морин хуур, хөөмий, монгол бүжгийн тоглолтыг таалан соёрхож, шагайн харвааг сонирхов. Ирсэн зочдод үндэсний хувцас, хоол, идээ ундааг сурталчлан танилцуулсан нь олны талархлыг мөн хүлээв.

      Энэ ташрамд ЭСЯ-наас зохион байгуулсан уг арга хэмжээг дэмжин оролцсон Соёлын элч Ж.Лантри, Шагайн Харваа- Австрали, Mongol Shop , "Наадам" ресторан, Г.Бөхчулуун, Д.Эрдэнэсувд, Ө.Эрдэнэтуяа, Д.Сүлд-Од нарт талархал илэрхийлье.