Тээврийн цагдаагийн албанаас 12 настай охины ослын талаар нэмэлт мэдээлэл хийлээ.

   Энэ үеэр Тээврийн цагдаагийн албаны Мөрдөн шалгах хэлтсийн дарга, цагдаагийн хошууч В.Хосбаяр “Одоогоор ослын талаар эхний шинжээчийн дүгнэлт ирсэн. Эхний байдлаар иргэн С-ийн эрүүл мэндэд хөнгөн хохирол буюу зүүн өвдөгний шарх, баруун шилбэний гэмтэл тогтоогдсон. Энэ нь Шүүх эмнэлгийн гэмтлийн тогтоох журмын 2.4.1-т зааснаар гэмтлийн хөнгөн зэрэгт хамаарна гэсэн шинжээчийн дүгнэлт гарсан байна. Үүн дээр тулгуурлаад хохирогчийн ар гэрээс нэмэлт эрүүл мэндийн байгууллагаар шинжилгээ хийлгэсэн нэмэлт материалыг прокурорын байгууллагад шинжээч томилон ажиллаж байна. Мөн тухайн хэрэгт иргэдийн эрүүл мэндэд хохирол учруулахаас гадна долоон тээврийн хэрэгсэлд хохирол учирсан. Урьдчилсан байдлаар 117 сая төгрөгийн хохирол учирсан байна. Тус хэлтсээс мөрдөн шалгах ажиллагаа явуулж байна. Шинжээчийн дүгнэлт гарч ирсний дараа Эрүүгийн хуулийн тусгай ангийн 27.2 дахь хэсэгт заасны дагуу яллагдагчаар татахад саналаа хүргүүлэхээр ажиллаж байна” гэв.