Тээврийн цагдаагийн албанаас цаг үеийн асуудлаар мэдээлэл өглөө.

     Тээврийн цагдаагийн албаны дарга, цагдаагийн хурандаа О.Ганбат “М гэгч тухайн өдөр тээврийн хэрэгслийг хөдөлгөөнд анхнаас нь унаад хөдөлгөж байгаа бичлэгийг авсан. Гэвч прокуророос гадагш ил болгох зөвшөөрөл өгөөгүй учир бичлэгийг үзүүлэхгүйгээр тайлбар, мэдээллийг өгье. Тухайн өдөр Баянзүрх дүүргийн нутаг дэвсгэр Норжин худалдааны төвийн хойд хэсгийн шороон замаас “Ланд Круйзер-200” маркийн 7020 тээврийн хэрэгсэл хөдөлгөөн хийж эхэлсэн. Ингэхдээ эхлээд тухайн тээврийн хэрэгсэлд Б гэх иргэн суугаад, хавчигхан хоёр грашийн дундах хөдөлгөөнд хойш, урагш өнхөрүүлж байгаад урд талынхаа ханыг мөргөж байгаа бичлэг байна. Тэгээд хажууд нь байсан хүн зогсоогоод, зорчигчийн суудалд сууж байсан хүн ирж тухайн тээврийн хэрэгслийн рульд суугаад хөдөлгөөнд оролцож байгаа бичлэг байна. Зүүн дөрвөн замын уулзвараар Нарантуулын хойд тал, Нарантуулаас Их монголын уулзвар хүртэл дүрмийн зөрчилгүй хөдөлгөөн хийгээд хойд хэсэг хүртэл явсан нөхцөл байдал тогтоогдсон. Үүн дээр хүмүүс эргэлзэх шалтгаан байхгүй. Тус тээврийн хэрэгсэл нь цааш яваад осол гарсан. Энэ үед  цагдаагийн байгууллага болон эмнэлгийн байгууллага 15 минутад амжиж очсон байгаа юм. Улмаар хэргийн газрыг хамгаалалтад авч, үзлэг, бусад бүх зүйлийг хуулийн хүрээнд зохион байгуулж хийсэн байгаа. Ослын улмаас гэмтсэн хүүхэд эмнэлэгт эмчлүүлж байгаа. Биеийн байдал нь харьцангуй гайгүй гэсэн мэдээлэл ирсэн" гэв.