Хууль зүйн, дотоод хэргийн яамны Төрийн нарийн бичгийн дарга П.Сайнзориг цахим хуудастаа “Хошин шогийн хэдэн хүний эрхийг зөрчигч алиалагч нар  бас хувь нэмэр оруулсан даа. Хүн доромжилдгоо урлаг гээд ойлгосон гамшгууд. Хүн доромжилсний төлөө төрөөс ч элдэв шагнал, гавьяатын тэмдэг зүүж өгдөг өө больмоор юм” гэж бичжээ. Үүнд хошин урлагийн жүжигчид дургүйцлээ илэрхийлэн өнөөдөр огцрохыг шаардлаа. 

   Тэгвэл энэ талаар  П.Сайнзориг “Би хошин урлагийн жүжигчдийг яг ч доромжлоогүй. Хүнийг ярианы хэллэг, хүйсийн чиг баримжаа, ядуу байдал зэрэг харагдах үзэгдлийг доромжлох үзэгдэл нэлээд байна. Бид үүнийг хэвийн юм шиг ойлгодог болсон байна. Урлаг үүнийг хэвийн юм шиг харагдуулж, хэвийн юм шиг ойлголтыг хүүхэд, залуучуудад өгч болохгүй гэдэг зүйлийг бичсэн. Урлаг өөрөө ёс зүйтэй байх ёстой. Тодорхой хүнд сэдвүүдийг хөндөж байгаа бол үүнийгээ үзэгчдэдээ тодорхой хэмжээнд хэлж, тодорхой тайзан дээр тавьдаг байх хэрэгтэй. Уран бүтээлчид бүтээлийнхээ агуулгыг анхаараасай л гэдэг утгаар хэлсэн" гэв.