ХЗДХЯ-ны Төрийн нарийн бичгийн дарга П.Сайнзориг өөрийн албан ёсны цахим хуудсаараа дамжуулан хошин урлагийнханд хандаж шүүмжлэл илэрхийлжээ. Тэрбээр "Хошин шогийн хэдэн “хүний эрхийг зөрчигч”алиалагч нар ч бас хувь нэмэр оруулсан даа. Хүн доромжилдогоо урлаг гээд ойлгосон гамшигууд. Хүн доромжилсоны төлөө төрөөс ч элдэв шагнал, гавьяатын тэмдэг зүүж өгдөг өө одоо болимоор юм. Компаниуд зар суртачилгаа, улс төрийн намууд сонгуульд хүн доромжлогч нараар нүүр царай хийж оодруулдагаа болих хэрэгтэй" хэмээн бичжээ.

             Энэ талаар тэрбээр тайлбар өгөхдөө “Хүнийг ярианы хэллэг, хүйсийн чиг баримжаа гэх мэт тодорхой хэмжээнд харагдах байдлаар нь доромжлох үзэгдэл байна. Үүнийг хэвийн үзэгдэл мэтээр хүүхэд залуус, олон нийтэд ойлголт төрүүлэх нь хамгийн буруу гэдгийг л хэлэх гэсэн юм. Урлаг хэлбэрээр илэрхийлэх гэж байгаа бол ёс зүйтэй байж, тайзанд гарсан цагтаа харуулах хэрэгтэй. Олон нийтийн сүлжээнд цацах нь хамгийн буруу. Би хэн нэгэн уран бүтээлчийн нэр төрд халдаж, санаатайгаар доромжлох гээгүй. Тухайлбал, хичээл сургуулийн улирал эхэлсэнтэй холбоотой, хөдөө орон нутгийн оюутан, залуусыг ялгаварлан гадуурхах үзэгдэл бий болдог. Энэ бол яав ч хэвийн үзэгдэл биш. Тиймээс бид хамтдаа нийгмээ өөрчилж, зөв ойлголтыг бий болгохгүй бол хүний сэтгэлзүйд ийм байдлаар халдаж болохгүй” гэв.