Хэнтийгээс Дорнод аймгийн Матад суманд байрлах 0306 дугаар анги руу цэрэгт татагдсан залуусыг тээвэрлэж явсан автомашин замын хажуу руу унаж, зорчигчид гэмтсэн. Энэ талаар Хил хамгаалах Ерөнхий газрын дарга Х.Лхагвасүрэн мэдээлэл өглөө. Тэрбээр “Хэнтийгээс татагдсан цэргийг тээвэрлэж явсан автомашин осолдсон. Автомашины жолооны аппарат хагарч, машин замын хажуу руу унасан. Дөрвөн зорчигчийн толгой хагарч, хоёрынх нь хүзүү гэмтсэн байсан. Эмнэлгийн шуурхай багийнхан Хэнтий аймгийн нэгдсэн эмнэлэгт үзлэг хийсэн. Ослын улмаас гэмтсэн зорчигчдыг аймгийн эмнэлэгт эмчлэх боломжтой гэх хариу өгсөн. Цэргийн ар гэрийнхэн эмч нартай уулзсан. Бэртсэн цэргүүд өөрсдийн саналаар цэргийн алба хаахыг зөвшөөрвөл үргэлжлүүлж болно. Харин энэ жил цэрэгт явахгүй өнжих саналтай цэргүүдийг өнжөөж байгаа" гэв.