Согтуурсан байдлыг нь далимдуулж, гар утсыг нь дээрэмдсэн хэрэг гарчээ. Тухайлбал, Баянзүрх дүүргийн хоёрдугаар хорооны нутаг дэвсгэрт байрлах зочид буудлын орчимд “Үл таних хүн миний хоолойг боож, гар утас дээрэмдсэн" гэх дуудлага цагдаагийн байгууллагад ирсэн байна. Дуудлагын дагуу Баянзүрх дүүрэг дэх цагдаагийн хоёрдугаар хэлтсээс шалгахад 2022 оны аравдугаар сарын 17-ны өдрийн 15:00 цагийн үед нэгэн этгээд 47 настай эмэгтэйн биед нь халдан эд зүйлийг нь дээрэмджээ.

        Тус этгээд нь хэргийг үйлдэхдээ, хохирогчийг согтууруулах ундааны зүйл хэрэглэсэн байдлыг далимдуулж ухаан алдуулан хүчирхийлсэн болох нь тогтоогдсон байна. Харин Баянзүрх дүүрэг дэх цагдаагийн хоёрдугаар хэлтсийн эрүүгийн цагдаагийн тасгийн алба хаагчид шуурхай ажиллан уг гэмт хэргийг үйлдсэн байж болзошгүй 1999 онд төрсөн "Э" гэгчийг дайчлан баривчилж, үзлэг, шалгалт хийсний үр дүнд хохирогчийн гар утсыг биеэс нь хураан авчээ. Цагдаагийн байгууллагаас мөрдөн шалгах ажиллагааг үргэлжлүүлэн явуулж байгаа бөгөөд хохирогч эмэгтэй эмнэлэгт хүргэгдэн эмчлүүлж байгаа аж.