Баянзүрх дүүргийн нутаг “Олимп” хотхоны хойно дөрвөн автомашин мөргөлдөж, хүн гэмтсэн байна гэх дуудлага мэдээлэл бүртгэгджээ. Дуудлагын дагуу Тээврийн цагдаагийн албаны жижүүрийн бүрэлдэхүүн хэргийн газрыг хамгаалалтад авч, үзлэг шалгалтыг хийхэд Баянзүрх дүүргийн 26 дугаар хороо “Олимп” хотхоны хойд замд энэ сарын 10-нд “Toyota Landcruiser-200” маркийн тээврийн хэрэгслийг жолоодож явсан жолооч нь замын эсрэг урсгалд орж, долоон автомашины мөргөж, замаас гарч явган хүний замаар явж байсан явган зорчигч С 12 настай эмэгтэй, Э 12 настай эмэгтэй нарыг мөргөж эрүүл мэндэд нь хохирол учруулсан байна. Тухайн осол, хэргийг үйлдсэн жолооч 1993 онд төрсөн, эмэгтэй М нь энэ осол гардаг өдөр 18:00 цагийн үед найз залуу болох Б-г согтуугаар автомашин жолоодуулахгүй байх зорилгоор түүний төрсөн ахын эзэмшлийн “Toyota Land Cruiser” маркийн тээврийн хэрэгслийг жолоодож явахдаа дээрх ослыг гаргасан байна. Жолооч М нь тээврийн хэрэгсэл жолоодох эрхийн үнэмлэхгүй, осол хэрэг үйлдэх үедээ согтууруулах ундааны зүйл хэрэглээгүй драйгер багаж үлээлгэж шалгахад 0,00 хувьтай гарсан бөгөөд мансууруулах эм, сэтгэцэд нөлөөт бодис хэрэглэсэн эсэхийг урьдчилсан байдлаар тогтоох зорилгоор түүний шээсэнд тусгай зориулалтын тест тавин шалгахад ямар нэгэн мансууруулах эм, сэтгэцэд нөлөөт бодис илрээгүй байна. Түүний биеэс биологийн дээж болгон цус авч Шүүхийн шинжилгээний хүрээлэнд шинжээч томилсон. Явган зорчигч С-ын эрүүл мэндэд учирсан хохирлыг тогтоохоор шинжээч томилсон боловч дүгнэлт гараагүй, уг хэргийг ТЦА-аас ослын шалтгаан нөхцлийг тогтоохоор мөрдөн шалгах ажиллагаа үргэлжилж байгаа аж.