Жижиг, дунд үйлдвэрийн газрын дарга Я.Эрдэнэсайхан, Нийслэлийн жижиг, дунд үйлдвэр, үйлчилгээг дэмжих төв НӨҮГ-ын дарга Г.Гангамөрөн, ЖДҮГ-ын Хууль, тусгай активын хэлтсийн дарга Р.Надмидцэдэн нар "Батзүү" ХХК-ийн үйл ажиллагаатай танилцлаа. Тус компани нь Монгол Улсад анх удаа сүлжмэл нарийн даавуу үйлдвэрлэж эхлээд байгаа билээ. 

        Энэхүү даавуу үйлдвэрлэх зориулалт бүхий төхөөрөмж нь Герман улсад үйлдвэрлэсэн, хамгийн сүүлийн үеийн шинэлэг, инновац шингэсэн бүтээгдэхүүн аж.  Үйлдвэр  дотроо бүтээгдэхүүний шинж чанараа тогтмол хянах үүрэг бүхий лаборатори ажиллуулж байгаа нь бас нэг давуу тал юм.

   Оёдлын салбарын нэгдсэн мэргэжлийн холбооноос санаачлан энэ жилээс  цэцэрлэгийн хүүхдийн биеийн тамирын хувцсыг нэхмэл, сүлжмэл даавуу, оёмол бүтээгдэхүүний аюулгүй байдал, техникийн шаардлагын дагуу монгол хүүхдийн биеийн онцлогт тохирсон, хөдөлгөөнд саад болохгүй, сургалтын орчинд нийцсэн, арьсанд элдэв харшил өгч, сөрөг нөлөө үзүүлэхгүй чанартай үйлдвэрлэж эхэлсэн байна. Материал үйлдвэрлэлээс эцсийн бүтээгдэхүүн хүртэлх бүх шат дамжлагыг мэргэжлийн өндөр түвшинд эх орондоо кластераар үйлдвэрлэж байгаа аж.

     Биеийн тамирын хувцасны материал нь хүүхдийн арьсанд шууд хүрдэг тул техникийн шаардлага, стандартыг хангасан байх ёстой. Энэхүү даавууг монголдоо үйлдвэрлэж байгаа бөгөөд 100 хувь хөвөн даавуун материал юм. Байгальд ээлтэй, зөөлөн, харшил үүсгэхгүй, үнэр бактерийн эсрэг хамгаалалттай, арчлахад хялбар, амьсгалах чадвартай, хөлс шингээдэг, суналт агшилт сайн, монгол хүний царайны өнгөнд тохирсон номин цэнхэр өнгөтэй. Шошгыг гадна талд оёсон тул хүүхдийн биеийг нухахгүй, нэр бичих хэсэгтэй тул багш, хүүхдүүдэд эвхэж хураахад хялбар байдлаар шийджээ.