Чөлөөт бөхийн ОУХМ, улсын начин Нэргүйн Түмэннаст зургадугаар сарын 12-ны өдөр өвчний улмаас таалал төгсч, Монголын чөлөөт бөх төдийгүй үндэсний бөхөд нөхөж баршгүй хүнд гарз тохиолоо.

Н.Түмэнаст нь 1967 онд Өвөрхангай аймгийн Сант суманд төрж бага залуугаасаа чөлөөт бөхийн спортоор хичээллэж “Барселона-1992” зуны олимпийн их наадамд эх орноо төлөөлөн оролцсон. 1991, 1992 оны Азийн аварга шалгаруулах тэмцээнээс хошой мөнгө, 1987 оны Дэлхийн цомын мөнгө, 1989 оны залуучуудын ДАШТ-ээс мөнгө, Социалист орнуудын нийгмийн аюулаас хамгаалах байгууллагуудын “Нөхөрлөл” , Найрамдалт армиудын СКДА, “Динамо”, “Хөдөлмөр” нийгэмлэгийн нэрэмжит олон улсын тэмцээнээс алт, оюутан, залуучуудын “Нөхөрлөл” ОУТ-ээс хүрэл, “Монгол говь” ОУТ-ээс алт, мөнгө, хүрэл, УАШТ-ээс нэг мөнгө, долоон хүрэл медаль хүртэж 1990-ээд оны Монголын чөлөөт бөхийн урдаа барьдаг тамирчдын нэг байв.

Тэрээр үндэсний бөхөөр ардын хувьсгалийн 72 жилийн ойн баяр наадмаар улсын заан З.Дүвчингээр тав давж улсын начин цол хүртсэн. Сүүлийн 20-иод жилийн хугацаанд Хил хамгаалах Ерөнхий газрын “Хилчин” спорт хорооны дасгалжуулагчаар үр бүтээлтэй ажиллаж байлаа.

Талийгаачийн улс орныхоо төлөө зүтгэсэн нөр их хөдөлмөр, шулуун шударга, ажилч хичээнгүй, нөхөрсөг даруу зан бидний сэтгэл зүрхэнд үүрд дурсагдах болно. Түүний гэр бүл, үр хүүхэд, төрөл төрөгсөд нь гүн эмгэнэл илэрхийлье.

МОНГОЛЫН ЧӨЛӨӨТ БӨХИЙН ХОЛБОО