Улаанбаатар хотоос Ховд аймаг руу эм, тариа, дайвар ачиж явсан автобус Говь-Алтай аймгийн Улаан туг багийн Дундын овоо гэдэг газарт энэ сарын 8-нд шатсан. Галын улмаас бүх ачаа нь шатсан бөгөөд нийт мөнгөн дүн ойролцоогоор 157 сая төгрөг болоод байгаа. Тэгвэл автобусыг жолоодож явсан Ц.Түвшинбаатараас юу болсон талаар тодрууллаа.

-Хандивын аяны хүрээнд өнөөдрийн байдлаар тав орчим сая төгрөг бүрдээд байна-

-Автобус юунаас болж шатсан бэ. Танд өмнө нь ямар нэг дуу орсон юмуу, эвдэрсэн байж болзошгүй зүйл мэдэгдсэн үү?

-Цахилгааны масс гарч, автобус мотор буюу арын хэсгээсээ эхэлж шатсан. Хүмүүсийн дайвар, хүнс, гар утас, эм эмнэлгийн хэрэгсэл ачиж явсан. Тавдугаар сарын 8-нд гараад Говь-Алтай аймагт явж байхдаа шатсан. Ямар нэг эвдрэл гэмтлийн улмаас хөдөлгөөн саатах, дуу орох зэрэг зүйл мэдэгдээгүй, шууд л шатчихсан. Би туслах жолоочтойгоо хамт явж байсан. Шатаж эхлэнгүүт нь автобусаа зогсоогоод, бууцгаасан. Одоо биеийн байдал зүгээр, Ховд аймагт байна.

-Та автобусаа хэзээ оношлогоонд оруулсан бэ?

-Өнгөрсөн жил автобусаа оношлогоонд оруулсан. Энэ жил коронавирусийн улмаас оношлогоо хийгээгүй байсан.

-Дайвар өгч явуулсан хүмүүсээс ямар шаардлага тавьж байгаа вэ?

-Зарим нь төлүүлнэ, зарим нь “Болох байлгүй дээ” гэсэн. Өөр нэг хүмүүс нь “Төлбөрөө хурдан төл” гээд яаруулаад л байна. Ачааныхаа үнийг нэмж төл гэсэн хүн байхгүй.

Коронавирусийн улмаас энэ жил автобусаа оношлогоонд оруулж чадаагүй

-Хэчнээн хүний дайвар байсан бэ?

-Тэмдэглэж авсан цаас шатсан учир тоог нь сайн хэлж мэдэхгүй байна. Барагцаагаар 30 орчим хүний дайвар байсан байх. Үүнээс ч илүү байж магадгүй. Дандаа л хүнс, гар утас зэрэг янз бүрийн зүйл байсан. 3-4 хүний гар утасны төлбөр гэхэд л нийлээд 100 сая төгрөг болоод байгаа. Гар утасных нь паданыг эзнээс авч, харсан. Яах аргагүй 100 сая хүрч байна лээ. “Гар утас шүү” гээд хайрцагтай зүйл өгсөн. Дотор нь хэчнээн утас байсныг мэдэхгүй. Галын дүгнэлт гарахаар нийт мөнгөн дүн нь тодорхой болох байх. Говь-Алтай аймгийн нутагт явж байхад шатсан учир тэнд бүх зүйл нь шийдэгдэх байх.  

-Эм, эмнэлгийн хэрэгсэл ачиж явсан. Эмнэлгийн байгууллагаас холбогдсон уу?

-Эмнэлгийн байгууллагаас намайг буруушаасан зүйл байхгүй. Эм, тарианы нийт мөнгөн дүн 21 сая төгрөг болсон.  Зарим нь галд шатах нь шатаад, урвалд орох нь ороод дууссан.

-Хандивын аян эхлүүлсэн байна лээ. Одоогоор хэчнээн төгрөг бүрдээд байна вэ?

-Надад дайвар өгч явуулсан хүмүүс хандивын аян эхлүүлсэн юм билээ. Одоогоор тав орчим сая төгрөг бүрдээд байна.