• Өнөөдөр 2024-03-29

Б.БАТ-ЭРДЭНЭ: Засгийн газраас үнэ нэмсэн байгууллагад торгуул ногдуулахгүй байх чиглэл өгсөн

2021-05-01,   1188

Үнийн хөөргөдөл үүсгэсэн аж ахуйн нэгж байгууллагыг 2-20 сая төгрөгөөр торгоно. Энэ дагуу ШӨХТГ-аас хяналт, шалгалт хийж байгаа билээ. Сүүлчийн үед хүнсний дэлгүүрүүд бараа бүтээгдэхүүний үнэ үнээ нэмээд байгаа. Үүнтэй холбоотойгоор ШӨХТ-аас хүнсний дэлгүүрүүдэд хэрхэн хяналт шалгалт хийж байгаа талаар ШӨХТГ-ын дарга Б.Бат-Эрдэнээс тодрууллаа.

-Хөл хорионы хатуу дэглэм тогтоосон үеэс эхлэн үнийн зохиомол хөөргөдөл үүсгэсэн аж ахуйн нэгж байгууллагад торгуулийн арга хэмжээ авч буй. Өнөөдрийг хүртэл хэчнээн худалдааны төвд торгууль ногдуулаад байна вэ?

-Дөрөвдүгээр сарын 10-наас хойш хөл хорионы хатуу дэглэм тогтоосон. Үүнээс 1-2 хоногийн өмнө тодорхой хэмжээгээр үнийг хөөргөдөл үүссэн. Үнэ хөөрөгдөх бас нэгэн шалтгаан нь иргэн бүрт 300 мянган төгрөг олгосонтой холбоотойгоор худалдан авалт, эрэлт ихэссэн. Дөрөвдүгээр сарын 9-ний байдлаар “Хүчит шонхор” захад махны үнэ килограмм тутамдаа 3000-4000 төгрөгөөр нэмэгдсэн. Тухайн үед махны жижиглэнгийн худалдааны 46, 47 гэсэн хоёр лангууны түрээслэгчийг тус бүр хоёр сая төгрөгөөр торгосон. Өнөөдрийг хүртэл үүнээс өөр торгуулийн арга хэмжээ аваагүй байсан. Харин өнөөдөр “Таван-Эрдэнэ” захад лангуу түрээсэлдэг хоёр иргэнд тус бүр хоёр сая төгрөгийн торгуул ногдуулсан байгаа. Тус захын удирдлагууд дотоод хяналт шалгалтын хүрээнд тухайн түрээслэгчдэд бараа, бүтээгдэхүүний үнийг нэмэхгүй байх талаар хэд хэдэн удаа сануулга өгсөн юм билээ.  Мөн ШӨХТГ-аас хэд хэдэн удаа сануулга өгсөн. Уг сануулгыг биелүүлээгүй учир торгуул ногдуулсан. Тухайн хоёр иргэн хоорондоо үгсэн тохиролцож, энэ барааг ийм үнээр л зарна гэх мэтээр ярилцсан юм билээ.

-Томоохон худалдааны төвөөс гадна хүнсний дэлгүүрүүд бараа, бүтээгдэхүүний үнийг огцом нэмсэн. Үүнд ШӨХТГ-аас хэрхэн хяналт тавьж байгаа вэ?

-Хүнсний дэлгүүрүүд барааны үнээ нэмж байгаа талаар ярилаа. Ямар бараа гэдгээс хамаараад үнэ өсөх эсэх нь ялгаатай байгаа. Тодруулбал, бараа, бүтээгдэхүүний тээврийн хөлсний өсөлттэй холбоотойгоор үнэ нь өсөж байгаа. Үүнийг үнэ хөөрөгдсөн гэж үзэхэд хэцүү. Жишээлбэл, нарийн ногооны тээврийн хөлс нэмэгдэж, хомстоод байгаа. Иймд нарийн ногооны үнэ нэмсэн худалдагчдад торгуулийн арга хэмжээ аваагүй. Мөн хүнсний дэлгүүрүүд нэг ширхэг өндгийг 550 төгрөгөөр худалдаалж байгаа. Сүүлийн үед хомстол үүссэн учир ихэнх дэлгүүрүүдэд өндөг нийлүүлэгдээгүй байна. Өндөг худалдаалж байгаа байгууллагууд нь ихэвчлэн томоохон худалдааны зах, төв учир үнээ тодорхой хэмжээгээр барьж байна. 

Хүнсний дэлгүүр, зах, худалдааны төв зэрэг байгууллагуудад ялгаа байхгүй 2-20 сая төгрөгийн торгуул ногдуулж байгаа

-Зах, худалдааны төв болон лангуу түрээслэгч иргэд хэр шаардлага биелүүлж байна вэ?

-Засгийн газраас торгуулийн арга хэмжээг аль болох битгий ногдуул гэсэн чиглэл өгсөн учир энэ хүрээнд үнийн хөөргөдөл үүсгэсэн төвүүдэд өнөөдрийг хүртэл сануулга өгсөөр ирсэн. Гэтэл үг авахгүй, өгсөн сануулгыг биелүүлэхгүй байгаа учир аргаа бараад албан шаардлага хүргүүлж байна. Торгуулийн арга хэмжээ авах тухай албан шаардлага хүргүүлэхэд хүртэл тоохгүй байгаа.

Өнгөрсөн арваннэгдүгээр сард 143 сая төгрөгийн торгуулийн арга хэмжээ авсан

Засгийн газраас дээрх чиглэлийг өгсөн учир бид өнөөдрийг хүртэл арга хэмжээ авалгүй ирсэн. Тодруулбал, хөл хорио тогтоосон хугацаа буюу дөрөвдүгээр сарын 10-наас өнөөдрийг хүртэл 20 гаруй хоног үнээ нэмсэн иргэдэд сануулга өгч, гуйсаар ирлээ. Одоо бол торгуулийн арга хэмжээг шууд авна. 

 

 


Б.БАТ-ЭРДЭНЭ: Засгийн газраас үнэ нэмсэн байгууллагад торгуул ногдуулахгүй байх чиглэл өгсөн
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2021-05-02 09:34:54
    зочин: Торгуулиа тавиач ээ. Хүнсний бүх юм, түүний дотор махны үнэ бүр галзуурч 15000 ₮ хүрлээ. Баруун европд зарагдаж буй махны үнэтэй бараг адил нэмэгдэв. Монголд цалин тэтгэвэр хэд билээ, барууны орнуудад хэд билээ Ханшаар бодоход арай дэндлээ. Юун 70 сая мал. Тэр их мал лав л бидэнд хүртээлгүй нь эндээс харагдаж байна. Ерөнхий сайд аа ! Ченж гэдэг шулаачдыг хазаарлах цаг нь болсон байна.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188