Жүдо бөхийн насанд хүрэгчдийн “ARA OPEN-2026”  нээлттэй тэмцээн “Ара комплекс”-т эхэллээ. Архангай аймагт жүдо бөхийн холбоо шинээр байгуулагдсантай холбоотойгоор тус тэмцээнийг явуулж байгаа аж.  Тус холбоо орон нутагтаа жүдо бөхийн хөгжлийг шинэ шатанд гаргах, хүүхэд, залуучуудыг спортоор, тэр дундаа жүдо бөхөөр хичээллэхэд уриалах, ирээдүйн олимп, дэлхийн аваргуудыг орон нутгаасаа төрүүлэх зорилгын хүрээнд “АРА ОПЕН” тэмцээнийг зохион байгуулж байгаа юм.

    Хоёр өдөр үргэлжлэх шагналын сан өндөртэй энэхүү тэмцээнд эрэгтэй, эмэгтэй нийт 14 жинд 32 байгууллагын 185 тамирчин хүч сорьж байна. Ялангуяа олон улсын тэмцээнд эх орноо төлөөлөн оролцдог шигшээ багийн тамирчдын дийлэнх нь энэ тэмцээнд өрсөлдөж буйгаараа онцлогтой. Тухайлбал, олимпын мөнгөн медальт, дэлхийн аварга, МУГТ Б.Баасанхүү, ДАШТ-ий медальт, МУГТ Э.Ариунболд, МУГТ Л.Энхрийлэн, ОУХМ К.Ёолк, МУГТ Б.Ганхайч, МУГТ Ө.Дүүрэнбаяр, залуучуудын дэлхийн аварга, ОУХМ А.Ариунзаяа,  ОУХМ Л.Сосорбарам нарын шилдгүүд оролцож байна. Мөн олимпын хүрэл, ДАШТ-ий алт, хүрэл медальт, Хөдөлмөрийн баатар, МУГТ  Х.Цагаанбаатар энэ тэмцээний -100 кг-д зодоглож байна.