Болгар Улсын Софи хотод жүдо бөхийн өсвөр үеийн 2025 оны дэлхийн аварга шалгаруулах тэмцээн наймдугаар сарын 27-31-ний өдрүүдэд үргэлжилж өндөрлөв. Энэ удаагийн өсвөр үеийн  дэлхийн аварга шалгаруулах тэмцээнд дэлхийн 71 орны 551 жүдочин хүүхдүүд өрсөлдсөн.  Манай улсын өсвөрийн жүдочин охид гурван медаль хүртсэн амжилт үзүүллээ.  ДАШТ-ий охидын 57 кг-ын жинд барилдсан “Winner” клубийн тамирчин Машбатын Цэндбазар түрүүлж, алтан медаль, мөн 57 кг-ын жинд “Magic team” клубийн тамирчин Ганхуягийн Энхжин хүрэл медаль, охидын 40 кг-ын жинд “Цагаанбаатар академи”-ийн тамирчин Баярзулын Хулан хүрэл медаль хүртсэн. Холимог багийн тэмцээнд шагналт тавдугаар байр, багийн нэгдсэн дүнгээр VII байрт шалгарсан амжилтыг үзүүлж, өсвөрийн дэлхийн аваргын өндөрлүүллээ.

ОХИДЫН 57 КГ-ЫН ЖИНД М.ЦЭНДБАЗАР  ДЭЛХИЙН АВАРГА БОЛЛОО

Өсвөрийн ДАШТ-ий гурав дахь өдөр  охидын 57 кг-ын жинд барилдсан “Winner” клубийн тамирчин Машбатын Цэндбазар, Япон Улсын тамирчин Нонока Ямакаваг юко үнэлгээгээр ялж, дэлхийн аваргын алтан медалийг хүртэв. М.Цэндбазар 57 кг-ын жингийн “С” хэсэгт сугалаа татаж, нэгдүгээр тойрогт гоц мөргөн ялалт авсан. Хоёрдугаар тойрогт  Шведийн Ханна Бабульфатыг ялсан. Гуравдугаар тойргийн барилдаанд Грекийн Данай Димоу буулган авсан.

Дөрөвдүгээр тойрогт “С” хэсгийн аваргын төлөөх барилдаанд  ОХУ-ын Екатерина Жданова хожсон. Тавдугаар тойрогт буюу хагас шигшээ барилдаанд Польшийн Магдалина Валегаг ялсан. Улмаар  Японы Норока Ямакаватай ДАШТ-ий аваргын алтан медалийн  төлөө барилдаж, нэг юко үнэлгээгээр түүнийг буулган авч, ДАШТ-ий алтан медаль хүртсэн.  Харин тус 57 кг-ын жинд  Г.Энхжин Гүржийн Тинатин Гульбани, Польшийн Жулия Сьемко, Туркийн Элиф Килич, ОХУ-ын Екатерина Жданова нарыг ялж ДАШТ-ээс хүрэл медаль хүртсэн юм.

М.Цэндбазарыг ДАШТ-ий финалын барилдааны  дэвжээнд өөрийнх нь багш “Winner” клубийн дасгалжуулагч, “Рио-2016” олимпын хүрэл, дэлхий аваргын хошой хүрэл медальт, Казахстан Улсын гавьяат тамирчин Галбадрахын Отгонцэцэг авч гараад  дэлхийн аварга тамирчин төрүүлэн гаргалаа. Ийнхүү Г.Отгонцэцэг багшийн шавь өсвөрийн дэлхийн аварга болсон.  Тус 57 кг-ын жинд Монгол охид “Давхар цохилт” хийж “Magic team” клубийн тамирчин Ганхуягийн Энхжин хүрэл медалийн төлөө ОХУ-ын тамирчин Екатерина Ждановатай  барилдаж, вазари үнэлгээ авч, улмаар цаг дуусахын өмнө өчих мэхээр цэвэр ялж ДАШТ-ээс хүрэл медаль хүртсэн нь гайхалтай байлаа.

"Софи-2025"  ДАШТ-ий 57 кг-ын жинд  медаль хүртсэн тамирчид:

1. Монголын М.Цэндбазар алтан медаль.

2. Японы Н.Ямакава мөнгөн медаль.

3. Монголын Г.Энхжин хүрэл медаль.

 3. Польшийн М.Валега хүрэл медаль тус тус хүртсэн юм.

М.Цэндбазар өнгөрсөн жил 2024 онд Перу Улсын Лима хотод болсон өсвөр үеийн ДАШТ-ий 57 кг-ын жингийн хэсгийн аваргын төлөөх барилдаанд ОУХМ Тэрбишийн Ариунзаяа хожигдож байлаа. Түүнийг ялсан Т.Ариунзаяа Канадын Мирослава Бондаренко, Японы Кей Сүзики, Францын Таллана Абдала нарыг ялж, алтан медалийн төлөөх барилдаанд Францын хоёр дахь тамирчин Манон Агатиг хожиж дэлхийн аварга болж байсан билээ.

 ДАШТ-ий охидын 57 кг-ын жинд 2024, 2025 онд хоёр жил дараалан Монгол охид финалдаж, дэлхийн аварга боллоо. Олимпын мөнгөн медальт, дэлхийн аварга, Хөдөлмөрийн баатар, МУГТ Д.Сумъяа аваргын барилдаж байсан 57 кг-ын жин үнэхээр “Монголчуудын жин” бололтой. Энэ жинд Монголчууд үнэхээр ундарга сайтай болжээ.  Ийнхүү Монголын жүдогийн “Ирээдүйн одод” болох өсвөрийн аваргууд тодорсоор л байна. Өсвөрийн дэлхийн аваргын алтан медаль нь М.Цэндбазарын их амжилтыг эхлэл байх болов уу.

Өсвөрийн дэлхийн аварга М.Цэндбазар 2008 оны долдугаар сарын 31-ний өдөр Төв аймгийн Өндөрширээт суманд мэндэлжээ. Тэрбээр одоо 17 настай. Жүдо бөхийн “Winner” клубийн тамирчин. Түүний  дасгалжуулагч, багш нь “Рио-2016” олимпын хүрэл медальт ДАШТ хошой хүрэл медальт Казахстан Улсын гавьяат тамирчин Галбадрах Отгонцэцэг билээ. Өсвөрийн дэлхийн аваргаас өмнө М.Цэндбазар Итали Улсын Женова хотод зохион байгуулагдсан, өсвөр үеийн жүдо бөхийн Европ тивийн цомын аварга шалгаруулах тэмцээний 57 кг-ын жинд өрсөлдөж  хүрэл медаль, Монгол Улсын насанд хүрэгчдийн шилдэг зургаан тамирчин өрсөлддөг “ТОП-6” тэмцээнээс хүрэл медаль  тус тус хүртэж байлаа.