Болгар Улсын Софи хотод жүдо бөхийн өсвөр үеийн дэлхийн аварга шалгаруулах тэмцээн үргэлжилж байна. Энэ удаагийн өсвөр үеийн  дэлхийн аварга шалгаруулах тэмцээнд дэлхийн 71 орны 551 жүдочин хүүхдүүд өрсөлдөж байгаа юм. Өсвөрийн ДАШТ-ий гурав дахь өдөр өчигдөр орой охидын 57 кг-ын жинд барилдсан “Winner” клубийн тамирчин Машбатын Цэндбазар, Япон Улсын тамирчин Нонока Ямакаваг ялж, дэлхийн аваргын алтан медалийг хүртлээ. М.Цэндбазар Шведийн Ханна Бабульфат, Грекийн Данай Димоу, ОХУ-ын Екатерина Жданова, Польшийн Магдалина Валега, Японы Норока Ямакава нарыг ялж ДАШТ-ий алтан медаль хүртлээ. Харин Г.Энхжин Гүржийн Тинатин Гульбани, Польшийн Жулия Сьемко, Туркийн Элиф Килич, ОХУ-ын Екатерина Жданова нарыг ялж ДАШТ-ээс хүрэл медаль хүртсэн юм.

       М.Цэндбазарыг дэвжээнд өөрийнх нь багш “Winner” клубийн дасгалжуулагч, олимп, дэлхийн хүрэл медальт, Казахстан Улсын гавьяат тамирчин Галбадрахын Отгонцэцэг авч гарсан юм. Ийнхүү Г.Отгонцэцэг багшийн шавь өсвөрийн дэлхийн аварга боллоо.  Тус 57 кг-ын жинд Монгол охид “Давхар цохилт” хийж “Женко” клубийн тамирчин Ганхуягийн Энхжин хүрэл медалийн төлөө ОХУ-ын тамирчин Екатерина Ждановатай  барилдаж, вазари үнэлгээ авч, улмаар цаг дуусахын өмнө өчих мэхээр цэвэр ялж ДАШТ-ээс хүрэл медаль хүртсэн нь гайхалтай байлаа.

"Софи-2025"  ДАШТ-ий 57 кг-ын жинд  медаль хүртсэн тамирчид:

1.М.Цэндбазар алтан медаль  Монгол.

2.Н.Ямакава мөнгөн медаль Япон.

3. Г.Энхжин хүрэл медаль Монгол.

3.М.Валега хүрэл медаль Польш.

     Өнгөрсөн жил 57 кг-ын жинд ОУХМ Тэрбишийн Ариунзаяа алтан медаль хүртэж, өсвөр үеийн дэлхийн аварга болж байсан билээ.  Ийнхүү ДАШТ-ий охидын 57 кг-ын жинд хоёр жил дараалан Монгол охид финалдаж, дэлхийн аварга боллоо. Олимпын мөнгөн медальт, дэлхийн аварга, Хөдөлмөрийн баатар, МУГТ Д.Сумъяа аваргын барилдаж байсан 57 кг-ын жин үнэхээр “Монголчуудын жин” бололтой. Энэ жинд Монголчууд үнэхээр ундарга сайтай болжээ. Ийнхүү Монгол Улсын баг, тамирчид өсвөр үеийн ДАШТ-ээс одоогийн байдлаар нэг алт, хоёр хүрэл медаль хүртээд байна. Өнөөдөр сүүлийн жингийн барилдаанууд явагдана. Маргааш багийн тэмцээн эхэлнэ.