Монгол Улс, ОХУ-ын зэвсэгт хүчний хамтарсан “Сэлэнгэ-2025” хээрийн сургууль ОХУ-ын Буриадын нутаг дэвсгэрт амжилттай зохион байгуулагдаж байна. Хамтарсан хээрийн сургуулиар үндсэн сургалт бэлтгэлийг тасралтгүй явуулахын сацуу хоёр орны цэргийн алба хаагчдын нөхөрлөлийг бэхжүүлж, гар нийлэмжтэй ажиллагааг сайжруулах, спортоор дамжуулан танилцах өдөрлөг, арга хэмжээг хоёр талын сургуулийн штабаас тус тус зохион байгуулж байгаа юм.

      Тус хээрийн сургуулийн үеэр ОХУ-ын соёлын өдөрлөг болжээ. ОХУ-ын талаас өдөрлөгийг спортын цогцолбор тэмцээн болон урлагийн тоглолт гэсэн хоёр үе шаттайгаар зохион байгуулсан байна. Хоёр орны цэргийн алба хаагчид хурд хүч, тэсвэр хатуужил, цэцэн мэргэн, багийн ажиллагаагаа сорин өрсөлджээ. Ингэхдээ хоёр орны цэргийн алба хаагчдаас бүрдсэн холимог багийг бүрдүүлсэн бөгөөд энэ нь тэдний нөхөрлөлийг бэхжүүлэхэд онцгой чухал үүрэг гүйцэтгэсэн байна.

      Монгол, ОХУ-ын цэргийн алба хаагчдаас бүрдсэн холимог багууд автомат болон “СВД” тогтоол буудлага, хөл бөмбөг, волейбол, буухиа, модон барилдаан, гийр өргөлт гэсэн зургаан хэлбэрээр нөхөрсөг тоглолтыг зохион байгуулсан ба энэ үеэр ОХУ-ын тогооч бүсгүйчүүд үндэсний зоогоороо дайлж, хоолны амталгаагаар дайлсан байна.