Монгол Улсын цахим спортын “The MongolZ” баг дэлхийн цомын аварга шалгаруулах “Esports World Cup-2025” тэмцээнд түрүүллээ. Саудын Арабын Эр-Рияд хотноо зохиогдож буй 1.25 сая ам.долларын шагналын сантай “Esports World Cup-2025” тэмцээний “CS-2” төрөлд “The MongolZ” баг аваргын төлөө Туркийн “Aurora” багтай учраа таарч 3:0-гийн харьцаатай ялалт байгуулснаар 500 мянган ам.долларын эзэн боллоо. “The MongolZ” баг цахим спорт сонирхогчдын олимп гэгдэх болсон “Esports World Cup-2025” тэмцээний “CS-2” төрөлд түрүүлэхдээ дэлхийн хүчирхэг “Vitality” багийг хагас шигшээ шатанд буулган авсан юм. Ийнхүү тэд энэ жил “Vitality” багийг хоёр дахь удаа буулган авсан цор ганц баг болж байна.