“Нүүдэлчин дэлхийн соёлын фестиваль” гурав дахь өдөр үндэсний спортын отгон төрөл болох адуучин тэмцээнд 19 аймаг, есөн дүүргийн нийт 35 тамирчин өрсөлдлөө. Тэмцээний тэргүүн байрт Увс аймгийн Өмнөговь сумын харьяат “Нүүдэлчин-2024” фестивалийн адуучин тэмцээний тэргүүн байрт, Увс аймгийн аварга шалгаруулах тэмцээний хошой медальт, сумын хошой аварга, бүсийн тэмцээний хошой алтан медальт, адуучин Н.Баатарсүрэн оров. Тэрбээр 1300 км-ын тэртээгээс тус фестивалийг зорин оролцсон нь энэ.

     Харин дэд байрт Багануур дүүргийн адуучин, “Нүүдэлчин-2024” фестивалийн тэргүүн байр, зүүн бүсийн хүрэл, Багануур дүүргийн адуучин тэмцээний алт, мөнгөн медальт Б.Бямбасүрэн орлоо. Удаах байрт Ховд аймгийн Буянт сумын харьяат, аймгийн хошой аварга адуучин Б.Дөлбаяр, Төв аймгийн Сэргэлэн сумын харьяат, аймгийн аварга адуучин Э.Түвшинжаргал, тавдугаар байрт Дундговь аймгийн Адаацаг сумын харьяат, сумын аварга адуучин Ш.Цэрэнбат оров.

    Энэ жилийн “Нүүдэлчин-2024” фестивалийн адуучин тэмцээнд түрүү булаалдсан хоёр адуучин өнгөрсөн жилийн тус тэмцээнд түрүү булаалдахад Б.Бямбасүрэн нь түрүүлж байсан бол Н.Баатарсүрэн энэ удаа даагаа нэхэж чадлаа. Адуучид уурга, ташуур шүүрэх, эмнэг булигуулах, морьтой уургалах, явган бугуйлдах гэсэн дөрвөн төрлөөр өрсөлдсөн бөгөөд тус тэмцээнд улсын аварга цолтой гурав, аймгийн аварга цолтой арав орчим адуучин өрсөлдсөн билээ.