Монгол Улсын Ерөнхийлөгчийн ивээл дор Хөвсгөл аймгийн Мөрөн хотод зохион байгуулагдсан 21 аймгийн аварга шалгаруулах хөл бөмбөгийн тэмцээн амжилттай болж хөшгөө хаалаа. Тэмцээний хаалтын ажиллагаа 2025 оны наймдугаар сарын 22-ны өдөр Хөвсгөл аймгийн Төв цэнгэлдэх хүрээлэнд ёслол төгөлдөр болж, шилдгүүдээ алдаршуулсан юм.

       Энэхүү арга хэмжээнд Монголын хөл бөмбөгийн холбооны Зөвлөлийн гишүүн С.Жаргалсайхан, Л.Наранбаатар болон Хөвсгөл аймгийн Төрийн захиргаа, удирдлагын хэлтсийн дарга Ц.Гончиг, Нийгмийн бодлогын хэлтсийн дарга Д.Цэцэгмаа, хамтран зохион байгуулагч Хөвсгөл аймгийн хөл бөмбөгийн холбооны нарийн бичгийн дарга Л.Энхболд болон МХБХ-ны дэд нарийн бичгийн дарга С.Жаргал нарын зочид төлөөлөгчид оролцож, шагнал гардуулав

      2025 оны 21 аймгийн аварга шалгаруулах тэмцээнд С.Жаргалсайхан болон Б.Билгүүн дасгалжуулагчаар удирдуулсан Дархан-Уул аймгийн шигшээ баг тэмцээний турш нэг ч оноо алдалгүй итгэл төгсгөл тэргүүлсэн бол удаах байрт М.Сэргэлэн болон А.Эрдэнэбаяр дасгалжуулагчтай Орхон аймгийн баг мөнгөн медалийг хүртлээ.

       Энэ жилийн дээд шатны нэгэн чимэг баг нь X.Жанибек дасгалжуулагчаар удирдуулсан Баян-Өлгий аймгийн шигшээ баг байсныг онцлох нь зүйтэй, тэд тэмцээний турш хүчтэй өрсөлдөөнийг учраа таарсан баг болгонд хүндрэл учруулж байсан юм, энэ жилийн дөрөвдүгээр байрыг Б.Тэмүүлэн дасгалжуулагчаар удирдуулсан Ховд аймгийн шигшээ баг эрэмблэгдэж дээд шатыг өнгөлсөн юм. 21 аймгийн аварга шалгаруулах тэмцээний дээд шатанд нийт 98 тоглогчид өрсөлдөж өөрийн хувийн ур чадвараар шилдэг тоглогчдыг шагналыг хүртлээ.

“ШИЛДЭГ ХААЛГАЧ”-аар Э.Пүрэврагч (Дархан-Уул аймаг)

“ШИЛДЭГ ХАМГААЛАГЧ”-аар А.Энхжин (Дархан-Уул аймаг)

“ШИЛДЭГ ХАГАС ХАМГААЛАГЧ”-аар (Д.Энхтөр)

“ШИЛДЭГ ДОВТЛОГЧ”-оор Г.Төгөлдөр (Дархан-Уул) тус тус шалгарлаа.

         Харин тус тэмцээний нэгдүгээр шатанд өрсөлдсөн нийт есөн багийн хооронд гал гарсан тулаанууд өрнөж, тэмцээнийг хүлээн авагч хамтран зохион байгуулагч Хөвсгөл аймгийн баг Л.Энхболд дасгалжуулагчаар удирдуулан дараа жилийн дээд шатны эрхийг авч аваргаар шалгарлаа. Нэгдүгээр шатны шигшээ тоглолтод Дорнод аймагтай үндсэн цагт тэнцэж улмаар ялагч шийдвэрлэх торгуулийн цохилтоор анх удаа аваргын болзол хангасан түүхэн үйл явдал болж тэмдэглэгдсэн юм.

Нэгдүгээр шатны тэмцээний шилдэгүүдээр :

“ШИЛДЭГ ХААЛГАЧ”-аар Н.Өлзиймягмар (Дорнод аймаг)

“ШИЛДЭГ ХАМГААЛАГЧ”-аар Б.Саруулхангай (Хөвсгөл аймаг)

“ШИЛДЭГ ХАГАС ХАМГААЛАГЧ”-аар Д.Бат-Эрдэнэ (Хэнтий аймаг)

“ШИЛДЭГ ДОВТЛОГЧ”-оор О.Хатанзориг (Хөвсгөл аймаг) нар тус тус шалгарав.

        21 аймгийн аварга шалгаруулах тэмцээнийг орон нутагтаа зургаан жилийн дараа дахин хүлээн авч, амжилттай зохион байгуулсан Хөвсгөл аймгийн Засаг даргын Тамгын газар, Нийгмийн бодлогын хэлтэс, Биеийн тамир, спортын газар Хөл бөмбөгийн холбоо зэрэг байгууллагын хамт олонд Монголын хөл бөмбөгийн холбооны ерөнхийлөгч Ц.Анандбазар болон нийт оролцогчдын нэрийн өмнөөс талархал илэрхийлж, хоймор нутгийн хийморь лундаа үргэлж ивээж байхын өлзийтэй ерөөлийг өргөн дэвшүүллээ.