Монголын хөл бөмбөгийн холбооноос зохион байгуулсан “U19” хүртэлх насны аварга шалгаруулах тэмцээнд нийт зургаан баг тойргийн системээр өрсөлдөж өчигдөр тэмцээний хөшгөө хаалаа. В.Мөнхжаргал дасгалжуулагчтай “Дэрэн” клубийн “U19” хүртэлх насны баг нэг ч оноо алдалгүйгээр итгэл төгс тоглолтыг үзүүлж таван тоглолтын дараагаар 15 оноотойгоор хүснэгтийг тэргүүлж аварга боллоо.

    Харин мөнгөн медалийг Мизухо Сасаки дасгалжуулагчтай “U19” хүртэлх насны “Ховд Вестерн” багийн залуучууд хүртэж, тус багаас “Шилдэг хаалгач”-аар Б.Баттүвшин, “Шилдэг хамгаалагч”-ийн шагналыг X.Билгүүн нар тус тус хүртлээ. “Улаангом Сити” клуб энэ жилийн “U19” хүртэлх насны баг хүрэл медалийг авч “Шилдэг довтлогч”-оор легионер тоглогч болох Кристофер Домингуез 12 гоолтойгоор шалгарлаа.