Дэлхийн бөхийн нэгдсэн холбооноос (UWW) 2023 оны чансааны оноо өгөх тэмцээнүүдийн хуваарийг танилцууллаа. Чансааны эхний тэмцээн хоёрдугаар сарын 1-5-ны өдрүүдэд Хорват Улсын Загреб хотод болох юм.  Үүний дараа Египет Улсын  Каирт хотод хоёрдугаар сарын 23-26-ны өдрүүдэд дараагийн тэмцээн болно. Үргэлжлэн Киргизстан Улсын Бишкек хотод зургадугаар сарын 1-4-ний өдрүүдэд,  Унгар Улсын Будапешт хотод долдугаар сарын 13-16-ны өдрүүдэд дэлхийн чансааны оноо олгох тэмцээн явагдана.

      Мөн тив, тивийн аварга шалгаруулах тэмцээн, ДАШТ, Азийн наадам, Панамерикийн наадамд чансаагаа ахиулах боломжтой.  Харин ДАШТ есдүгээр сарын 16-24-ний өдрүүдэд Серби Улсын Белград хотод болох юм, Азийн аварга шалгаруулах тэмцээн гуравдугаар сарын 28-наас дөрөвдүгээр сарын 2-ны өдрүүдэд Энэтхэг Улсын Нью Дели хотод болно. Азийн наадам есдүгээр сарын 23-наас аравдугаар сарын 8-ны өдрүүдэд Хятадад явагдах юм.