Япон Улсын Жүдо бөхийн холбооноос өнөөдөр жүдо бөхийн домогт аварга Шохой Оно зодог тайлж байгааг албан ёсоор мэдэгдсэн байна. Шохэй Оно "Рио-2016", "Токио-2020" олимпын наадмын аварга, "Рио Де Жанейро-2013", "Астана-2015", "Токио-2019" ДАШТ-ий аварга, өнөө цагийн жүдогийн домог болсон тамирчин билээ. Түүний энэхүү гэнэтийн шийдвэр жүдогийн ертөнцийг цочирдуулсан мэдээ болоод байна. Өдгөө 30 настай домог бөх маань цаашид Англи Улсад дасгалжуулагчаар суралцаж, Японы шигшээ багтаа ажиллах сонирхолтой байгаа аж. Шохэй Оно 2010 оноос олон улсын түвшинд 122 барилдаан хийж 113 ялж, есөн удаа ялагджээ. Үүнээс 2014 оноос хойш ганцаарчилсан барилдаанд ялагдаагүй. Харин Токио 2020 олимпын багийн барилдаанд ялагдал хүлээсэн юм.