Хөлбөмбөгийн дэлхийн аварга шалгаруулах тэмцээний хагас шигшээ тоглолтын дараа Франц, Марокко Улсын хөгжөөн дэмжигчдийн хооронд мөргөлдөөн гарсан байна. Тус эмх замбараагүй байдлаас болж нэг хүү амиа алджээ.

    Энэ хэрэг Франц Улсын өмнөд хэсэгт орших Монпелье хотод болсон ба орон нутгийн захиргаанаас гаргасан мэдэгдэлд дурдсанаар хүүг машинаар дайраад, хэрэгтэн хэргийн газраас зугтсан байна. Хүүг эмнэлэгт хүргэсэн боловч эмнэлэгт хүргэгдээд удалгүй нас баржээ.

       Машиныг хэргийн газрын ойролцоогоос олсон бөгөөд цагдаа нар хэргийг шалгаж байгаа аж. Хагас шигшээ тоглолтын дараа Парист хотод мөн л Франц, Мароккогийн хөгжөөн дэмжигчид мөргөлджээ. Францын шигшээ баг Марокког 2:0-ээр буулган авснаар ДАШТ-ий финалд шалгарсан юм. Тэд ням гарагт финалд Аргентинтай тоглоно.