Манай эмэгтэй баг дэлхийн цомын хүрэл медаль хүртлээ

2022-12-12, 392

Чөлөөт бөхий дэлхийн цомын тэмцээн энэ сарын 10-11-ний өдрүүдэд АНУ-ын Айова мужийн Коралвилль хотод боллоо. Манай зарим бөхчүүд визний асуудал, зардал мөнгөнөөс шалтгаалж бүтэн багаараа очиж чадаагүй. Хэрэв бүрэн бүрэлдэхүүнээрээ АНУ-д очсон бол эрэгтэй, эмэгтэй баг маань аль аль нь үүнээс ч илүү өндөр амжилт үзүүлэх боломжтой байлаа. Манай эмэгтэй баг Японы багийг ялж, Украины багт ялагдаж, АНУ-ын багтай хүрэл медалийн төлөө барилдаж 7:3-аар яллаа.

Эхний 50 кг-ын жингийн барилдаанд Д.Отгонжаргал, АНУ-ын Эрин Голстоныг цэвэр ялж багийн ялалтыг 1:0-ийн харьцаатай болгосон. Үүний дараа 53 кг-д Г.Отгонжаргал, Фелисити Тэйлорийг 12:1-ээр хожиж, багийн ялалтын харьцааг 2:0 болгов. Б.Болортуяа 55 кг-д Женна Буркертыг 7:6-ээр ялж, багийн ялалтыг 3:0 болгон холдуулсан.

Харин Б.Эрдэнэсувд 57 кг-д Aлександра Хедрикт 4:6-аар хожигдож багийн ялалтын харьцааг 3:1 болгосон юм. Э.Даваачимэг 59 кг-д Лекси Багамыг 13:2-оор ялж, багийн ялалтыг 4:1 болгов. С.Цэрэнчимэд 62 кг-д Кайл Мираклыг 16:5-аар ялж багийн ялалтыг 5:1 болгон холдуулсан.

Үүний араас 65 кг-д П.Орхон, Мэллори Велтийг 9:6-аар ялж , багийн ялалтыг 6:1-ээр тэргүүлэх боломжийг нээв. Ө.Пүрэвсүрэн 68 кг-д Солин Пиерст 0:2-ээр хожигдож багийн ялалтыг 6:2 болгов. Харин 72 кг-д Э.Даваанасан, Скилар Гротийг 7:1-ээр ялж, багийн харьцааг 7:2 болгосон. Ахмад тамирчин О.Бурмаа 76 кг-д, Димонд Гуилфордод 0:10-ээр хожигдож, багийн ялалтын харьцаа 7:3 болсрн хэдий ч, манай баг тамирчид АНУ багийг 7:3-аар буулган авч хүрэл медаль хүртлээ.

Манай эмэгтэй баг дэлхийн цомын хүрэл медаль хүртлээ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.