Дархан-Уул аймгийн ЗДТГ-аас төрийн албан хаагчдад харилцан туршлага солилцох, цаашдын хамтын ажиллагаа, уялдаа холбоог сайжруулах зорилгоор “Мэдлэг, чадвартай төрийн албан хаагчид” төсөл хэрэгжүүлж, төслийн хүрээнд спорт, урлагийн наадмуудаа амжилттай зохион байгуулжээ. Энэ удаагийн уралдаанд Гэр бүл, хүүхэд, залуучуудын хөгжлийн газрын баг тэргүүн байрт шалгарсан байна.

Төрийн албаны шинэтгэл, Монгол Улсын урт хугацааны  хөгжлийн бодлого, Алсын хараа-2050, Шинэ сэргэлтийн бодлогыг хэрэгжүүлэх хүрээнд мэдлэг, чадвар сорих уралдааныг зохион байгууллаа. Тус уралдаан нь багийн ахлагч нарын ур чадвар буюу эсээ бичлэг, багаар ажиллах чадвар буюу Дархан-Уул аймгийг 2023 онд хөгжүүлэх төлөвлөгөө боловсруулах, дүн шинжилгээ хийх чадвар, баримт бичиг боловсруулах ур чадвар, гамшиг ослын үед анхан шатны тусламж үзүүлэх ур чадвар, монгол бичгийн мэдлэг, ур чадвар гэсэн зургаан төрлөөр явагдсан юм.

Уралдаанд 30 гаруй байгууллагын 17 багийн 60 төрийн албан хаагч оролцож мэдлэг, чадвараа сорилоо. Шүүгчээр Төрийн албаны зөвлөлийн Дархан-Уул аймаг дахь салбар зөвлөлийн нарийн бичгийн дарга А.Лхагважаргал, аймгийн ЗДТГ-ын Хяналт-Шинжилгээ, үнэлгээний хэлтсийн дарга П.Баярсайхан, Аймгийн ерөнхий аудитор асан, төрийн захиргааны ахмад ажилтан Н.Бэрцэцэг нар ажиллажээ.