Монгол Улсад маань багийн спортын алтан үе ирж, шинэ үе сагсан бөмбөгөөр шамдан хичээллэж, шимтэн үзэж, хилийн дээс алхан урилгаар тоглож, шигшээ баг маань түүхийн шинэ хуудсыг нээсээр байгаа билээ.

       Монгол Улсын Гадаад харилцааны яам, Сан Франциско хот дахь Ерөнхий консулын газар, Бэй Аэриагийн монголчуудын холбоо хамтран сагсан бөмбөгийн спортоор дамжуулан монголын соёл урлагийг сурталчлах зорилгоор 2023 оны нэгдүгээр сарын 2-ны өдөр Америкийн үндэсний сагсан бөмбөгийн холбооны лигийн аварга баг “Golden State Warriors” багийн “Atlanta Hawks” багтай хийх тоглолтын салхийг хагалан, монгол уран нугаралтын гайхамшгийг дэлхийн сая сая хүмүүст үзүүлэх гэж байна.

      “Golden State Warriors” жил бүр Бэй Аэриад амьдардаг Ази гаралтай иргэдэд хүндэтгэл үзүүлэх зорилгоор “Азийн өв соёлын үдэш” зохион байгуулдаг юм байна. Ирэх жил ийнхүү монголчууд маань энэ үдшийг өнгөлөх боломж тохиолоо.