Увс аймгийн Өндөрхангай сумын харьяат аймгийн заан, спортын мастер Ц.Гонгор агсны нэрэмжит үндэсний бөхийн залуучуудын улсын аварга шалгаруулах тэмцээн боллоо. Тус тэмцээн хоёр өдрийн турш Дархан-Уул аймгийн БТС-ын газарт амжилттай зохион байгуулагдаж өндөрлөв. Тэмцээний хаалтын ажиллагаанд УИХ гишүүн Г.Дамдинням, Дархан-Уул аймгийн Засаг дарга Б.Азжаргал, Монгол Улсын арслан Б.Орхонбаяр нарын хүндэт зочид хүрэлцэн ирсэн байна.

   Залуучуудын улсын аваргын тэргүүн байрыг Говь-Алтай аймгийн Бугат сумын харьяат, “Аварга” БТДС-ийн бөх, сумын заан Д.Гантөгс эзэлжээ. Хоёрдугаар байрт  Дундговь аймгийн Эрдэнэдалай сумын харьяат “Алдар” спорт хорооны бөх, сумын заан Н.Амгаланбаатар орсон байна.

   Гуравдугаар байрт Булган аймгийн Хишиг-Өндөр сумын харьяат “Алдар” спорт хорооны бөх аймгийн начин Ц.Мөнхбаяр нар шалгарчээ. Багийн дүнгээр тэргүүн байрыг Монгол Улсын харцага Т.Өсөх-Ирээдүй дасгалжуулагчтай “Алдар” спорт хороо тэргүүлжээ. Хоёрдугаар байрт Б.Батхуяг дасгалжуулагчтай “Аварга” БТДС, гуравдугаар байрт Л.Өгийдалай дасгалжуулагчтай Архангай аймгийн багууд шалгарсан байна.