АНУ-ын Айова мужийн Коралвилл хотод чөлөөт бөхийн эрэгтэй, эмэгтэйчүүдийн дэлхийн цомын тэмцээн арванхоёрдугаар сарын 10-11-ний өдрүүдэд болно. Тус тэмцээнд оролцох Монгол Улсын шигшээ баг, тамирчдын нэрсийг АНУ-ын Чөлөөт бөхийн холбоо зарлажээ.

     Монголын чөлөөт бөхчүүд анх удаа эрэгтэй, эмэгтэйчүүдийн дэлхийн цомын тэмцээнийг хамтатган хийж буй  АНУ-ын дэвжээнд жин тус бүрт хоёр, нийт 40 хүний өргөн бүрэлдэхүүнтэй баг оролцох юм байна. Манай Улсаас дэлхийн аваргын алт, мөнгөн медальт, гавьяат тамирчин С.Цэрэнчимэд, олимп, дэлхий хүрэл медальт ОУХМ Б.Болортуяа, дэлхий аваргын аваргын мөнгө, хүрэл медальт ОУХМ М.Лхагвагэрэл, ОУХМ Д.Отгонжаргал, дэлхийн аваргын хүрэл медальт ОУХМ Б.Шоовдор, дэлхийн аваргын мөнгөн медальт ОУХМ Э.Сумъяа, ОУХМ Б.Хулан, дэлхийн аваргын хүрэл медальт ОУХМ Т.Тулга, ОУХМ З.Занабазар, ОУХМ Н.Наранхүү, ОУХМ Э.Даваачимэг нарын олимп, дэлхийн медальтай хүчирхэг баг АНУ-д зорихоор болов.

      Харин АНУ-ын олимп, дэлхийн медальтай эмэгтэй, эрэгтэй шилдэг бөхчүүд дэлхийн цомын шигшээ багийн бүрэлдэхүүнээ ороогүй байгаа юм. Олимп, дэлхийн аварга Хелен Марулис, Тамира Менса, дэлхийн аварга Доминик Пэрриш, дэлхийн аваргын хошой мөнгө, хүрэл медаль хүртсэн Сара Хилдебранд нар барилдахгүй.

      Олимп, дэлхийн аварга Дэвид Тэйлор, Токио 2020 олимпын хүрэл медальт, дэлхийн дөрвөн удаагийн аварга Кайл Дейк, Рио 2016 олимпын хүрэл медальт, дэлхийн хошой аварга Жейден Кокс, олимпын хүрэл медальт, дэлхийн аваргын алт, мөнгөн медальт Томас Гилман нарын шилдгүүд өнжихөөр болжээ.