ЗГХЭГ-ын дарга Ц.Нямдорж өнгөрсөн даваа гарагт төр, нийгмийн зүтгэлтэн С.Зориг агсны хэргийн захиалагч нь Хотын дарга асан, Нийслэлийн АН-ын дарга Э.Бат-Үүл гэж мэдээлсэн билээ. Үүнтэй холбоотойгоор нийслэлийн АН-ын дарга Э.Бат-Үүл өнөөдөр мэдээлэл хийлээ.

Тэрбээр “Өнгөрсөн 2019 оны дөрөвдүгээр сард намайг С.Зоригийг бүргэлсгэсэн хэрэгт холбоотой мэтээр гүтгэж байгаа хүмүүсийг олж, хариуцлага тооцож өгнө үү гэж Хууль зүй, дотоод хэргийн сайдад хандан олон удаа хандсан. Мөн УЕП-т хүсэлт явуулж байсан. Тэр үед Хууль зүйн яамны ТНБД Н.Билгүүнээс хариу ирж, хуулийн дагуу прокурорын байгууллагад шилжүүлсэн. Ингээд цаашаа Нийслэлийн прокурорт шилжиж, өнөөдрийг хүртэл энэ хэргийн хариуг хүлээж сууна.

Сүүлийн үед Ц.Нямдоржийн хачин үйлдлийг хараад байхад тэр үед хүсэлтээ буруу хүнд хаяглаж бололтой. Харин Ц.Нямдорж өөрөө энэ хэргийн захиалагч нь байж болзошгүй гэх албаны хүмүүсийн яриа үндэслэлтэй гэдгийг мэдэгдэж байна. Ингэж бодох гурван шалтгаан байна.

Нэгдүгээрт, Ц.Нямдорж  Хууль зүйн яамыг 20 жил удирдаж байна. УИХ, Засгийн газрын гишүүн байсан хүний хувьд хуульд захирагдах ёстой гэдгийг тэр сайн мэднэ. Гэтэл Ц.Нямдорж хуулийг уландаа гишгэж, сандарч тэвдэх боллоо. Өөрийгөө хуулиас дээгүүр тавьж байна.

Хоёрдугаарт, Ц.Нямдорж галзуу хүний өдрийн тэмдэглэл шиг зүйл ярьдаг боллоо. Ямар ч логик, авцалдаагүй. Айл гэр шатааж, хүний амь хороосон алуурчны үгийг хууль зүйн яамыг 20 жил толгойлсон хүн өргөж авчраад, ийм зүйл яриад сууж байна. Үүнээс харвал сэтгэц нь зүгээр байгаа даа гэсэн эргэлзээ төрүүлж байна.

Гуравдугаарт, Өөрийгөө хүний эрхийн төлөө тэмцэж байна гэж худлаа ярьж байна. Ц.Нямдорж хүний эрхийн төлөө биш хүний эрхийг чангалахын төлөө явдаг байсан. Эрүүдэн шүүх тоног төхөөрөмжийг тэр оруулж ирсэн. Одоо гэнэтхэн хүний эрхийн тэмцэгч болж харагдаад уналаа.

Миний энэ хардлага үнэн байх юм бол С.Зоригийг бүрэлгэсэн хэрэг гаднын захиалгатай гэсэн үг. Ц.Нямдоржийг гаднын тусгай албатай холбоотой гэдгийг тагнуулын байгууллагын удирдлагууд мэдэгдэж байсан. Ингэж мэдэгдсэнийхээ төлөө улсын нууц задруулсан хэргээр шоронд орж, ял сонссон. Тэр хүмүүсийг Ц.Нямдоржийг гүтгэсэн гэдгээр мөн ялласан байдаг. Түүнийг Монголын төрд гаднаас шургалуулсан хорт могой гэж үзэж байгаагаа хэлье” гэлээ.