Ерөнхийлөгчийн сонгуулийн санал хураах ажлыг зохион байгуулахаар сонгуулийн бүх шатны хороодыг байгуулсныг Сонгуулийн ерөнхий хороо мэдэгдлээ.

Тодруулбал, Монгол Улсын Ерөнхийлөгчийн сонгуулийн тухай хуулийн 12 дугаар зүйлийн 2-т заасны дагуу санал авах өдрөөс 30-аас доошгүй хоногийн өмнө буюу 2021 оны тавдугаар сарын 10-ны өдрөөс өмнө сонгуулийн хэсгийн хороод бүрэн байгуулагдлаа.

Сонгуулийн санал хураах үйл ажиллагаанд нийслэлийн 22 сонгуулийн хороо, 330 сум, есөн дүүргийн сонгуулийн хороо, 2087 хэсгийн хороодод нийт 18 мянга 647 төрийн захиргааны болон үйлчилгээний албан хаагч ажиллана. Харин сонгуулийн автоматжуулсан системийн хэвийн үйл ажиллагааг хангах мэдээллийн технологийн 31 багт 148 гишүүн, санал авах байруудад нийт 2481 даамал ажиллах юм байна.

Нэр дэвшигчдийн мөрийн хөтөлбөрийг тавдугаар сарын 24-ний өдрөөс эхлэн нээлттэйгээр байршуулснаар сонгуулийн сурталчилгаа эхлэхээр байна.