Орон нутагт коронавирусийн эсрэг вакцин хүргэх тээвэрлэлтийн цуваа өнөөдөр 11:00 цагаас ХӨСҮТ-ийн гадна талбайгаас хөдөлсөн. Уг үйл ажиллагааны үеэр Ерөнхий сайд Л.Оюун-Эрдэнэ вакцины татан авалтад нэр бүхий УИХ-ын гишүүд саад болж буй талаар хэлэв.

Тэрбээр “Нэг ширхэг ч вакцин татан авчирч, эсвэл үйлдвэрлэж чадахгүй бол бүү гай бол. Зарим улстөрчдийн хариуцлагагүй байдал вакцины татан авалтад нөлөөлсөн. Энэ асуудалд цар тахлын хажуугаар улс төржихгүй юм сан гэх үүднээс тэвчиж ирсэн. Би тийм ч их тэвчээр гаргаад, дуугүй өнгөрөөгөөд байдаг зан, харьцаатай хүн биш. Шаардлагатай бол тэр гишүүдийн нэрийг зарлана. Хүнд цаг үед эрүүл мэндийн салбарын эсрэг зохион байгуулалттайгаар буруу мэдээлэл өгч, хариуцлагагүй үйлдэл гаргана гэдэг эх орноосоо урвасан хэрэг юм. Иймд улс төрийн нэр бүхий алиа салбадайнуудад хатуу анхааруулна. Цар тахлын нөхцөл байдал гайгүй болсон үед энэ асуудалд нэр холбогдох УИХ-ын гишүүдийг хэлэх ёстой газарт нь хэлнэ” гэв.

Ташрамд дурдахад, Эрүүл мэндийн яамнаас Спутник вакцины татан авалт хойшилсон талаар мэдээлсэн билээ.