Монгол Улсын Засгийн газраас хатуу хөл хорио тогтоохтой зэрэгцэн иргэн бүрд 300 мянган төгрөгийн дэмжлэг үзүүлэх шийдвэр гаргасан. Сангийн яамнаас өгч буй мэдээллээр иргэн бүрт олгох 300 мянган төгрөгийг иргэдийн 85 хувьд арилжааны банкуудын оролцоотойгоор шилжүүлээд байгаа юм. 300 мянган төгрөгөө аваагүй цөөн тооны хүн үлдээд байгаа бөгөөд өчигдөр Хөдөлмөр,нийгмийн хамгааллын сайд А.Ариунзаяа хогийн цэгүүд дээр ажиллаж буй болон орон гэргүй, бичиг баримтгүй  иргэдтэй уулзлаа. Энэ үеэр холбогдох байгууллагууд хамтран мөнгөө аваагүй иргэдийн 300 мянган төгрөгийг олголоо.

Тодруулбал, Сангийн Яам, И-баримт, Хууль зүйн яам, Улсын бүртгэлийн ерөнхий газар, Төрийн банк, Хөдөлмөр, халамж үйлчилгээний ерөнхий газар, Монголын Улаан Загалмай Нийгэмлэгийн хамтаар орон гэргүй иргэд, Хогийн цэг дээр ажиллаж буй иргэдэд МУ-ын иргэн бүрд олгогдох 300 мянган төгрөгийг бүрэн олгохоор ажиллаж байгаа талаар ХНХ-ын сайд А.Ариунзаяа мэдээллээ.