Үндсэн хуулийн цэцийн дунд суудлын хуралдаанаар Ерөнхийлөгч Х.Баттулгыг 2021 оны Ерөнхийлөгчийн сонгуульд нэр дэвших эрх зүйн боломжтой эсэхийг эцэслэн шийдвэрлэлээ. Тодруулбал, Ерөнхийлөгчийн сонгуулийн тухай хуулийн зарим зүйл заалтууд нь Үндсэн хууль зөрчиж байна гэж үзсэн билээ. Өөрөөр хэлбэл, "Ерөнхийлөгчийн сонгуулийн тухай хуульд Ерөнхийлөгчөөр ажиллаж буй хүн дахин нэр дэвших эрхгүй гэдэг агуулгыг тусгайлан зааж өгөөгүй нь Үндсэн хууль зөрчсөн" гэж үзсэн юм.

Тэгвэл энэ талаар Үндсэн хуулийн Цэцэд мэдээлэл гаргагч, УИХ-ын гишүүн Т.Доржханд “Өнөөдөр Монгол Улсын түүхэнд тэмдэглэгдэхээр онцгой өдөр болж байна. Яагаад вэ, гэхээр өнөөдрийн гаргасан шийдвэр бол засаглалын эрх мэдлийг хэрхэн хуваах вэ, Монгол Улсад ардчиллыг цаашид хэрхэн бэхжүүлэх вэ, энэ нь бидний хадгалж үлдэх ёстой үнэт зүйл мөн үү гэдэгт маш том хариулт өгсөн үйл явдал боллоо. Нөгөөтэйгүүр, хуулийн байгууллагууд энэ үйл явдлыг тэмдэглэх талаар ярьж байна.

ҮХЦ-ийн дунд суудлын хуралдааны шийдвэрийг УИХ заавал хүлээж авах ёстой

Өнөөдөр өглөө ҮХЦ-ийн дунд суудлын хурал зарласан. Харамсалтай нь, цэцийн нэг гишүүний саналаар хуралдааныг хойшлуулсан. Ингээд 15:00 цагаас ҮХЦ шинэ бүрэлдэхүүнээр хуралдсан. Таван гишүүнтэй дунд суудлын хуралдаан өнөөдөр боллоо. Уг хуралдаанд мэдээлэл гаргаж хуульч Д.Үүрцайх, О.Мөнхсайхан, Г.Батаа болон парламентийг төлөөлж УИХ-ын гишүүн Н.Энхболд оролцлоо. Хуралдааны шийдвэрээр УИХ Үндсэн хуулийг зөрчсөн, тусгах ёстой заалтыг тусгаагүй байна гэж ҮХЦ үзсэн. Энэ шийдвэрийг УИХ 15 хоногийн дотор авч хэлэлцэх ёстой. Хэрвээ хүлээж авбал энэ шийдвэрийг хүчинтэйд тооцно. ҮХЦ зөв шийдвэр гаргаасай гэж хүлээж байсан. Хүлээлтэд нийцсэн шийдвэр гарлаа.

Энэ бол нэг хүний засаглалын төлөө бус ардчиллыг бэхжүүлэхийн төлөө юм. Өрсөлдөгчөө дахин ялахын тулд өөртөө эрх мэдэл төвлөрүүлдэг Ерөнхийлөгч нар зөндөө байлаа. Шууд хэлэхэд Ц.Элбэгдорж, түүний өмнөх Ерөнхийлөгч асан Н.Энхбаяр юм. Харин одоо Х.Баттулга гэдэг хүн маш их эрх мэдлийг өөртөө авсныг бүгд мэднэ. Энэ эрх мэдлээ ашиглаад өрсөлдөгчөө намнадаг, заримыг нь үндэслэлгүйгээр ялладаг, бизнесийг нь булааж авдаг. Ийм хүмүүсийг дахин дээрээ залах ёсгүй. Тийм учраас хуулиараа засагладаг байя. Засгийн газрын урдуур Ерөнхийлөгч орж ирээд газар ухаж, бизнес хийж, төмөр зам барьж байна. Өмнө нь мөн бизнес хийгээд 49 хувь гэсээр “Эрдэнэт” үйлдвэрийг булааж авсан. Иймд Засгийн газрын эрх мэдлийг Засгийн газарт нь, Ерөнхийлөгчийн эрх мэдлийг түвшинд нь тааруулж хязгаарлалт хийе гээд байгаа юм. Үндсэн хуулийн цэцийн гишүүд маш хүнд дарамттай нүүр тулсан талаар надад хэлсэн” хэмээн ярилаа.