ЕРӨНХИЙЛӨГЧИЙН ЭСРЭГ ХҮЧЭЭ НЭГТГЭХ ГИШҮҮД

   Ерөнхийлөгч УИХ-ын гишүүдийг том, жижиггүй нэлээн сандаргаж байна. Түүний санаачилсан хуулийн төслийг улс төрийнхөн эрс эсэргүүцэж байгаа ч ард түмэн сайн дэмжиж байгаа. Зарим нь "Ерөнхийлөгчийн хуулийг дэмжихгүй, Ерөнхийлөгч УИХ-ын гишүүнийг эгүүлэн татах хууль санаачлах эрхгүй" гэх зэрэг цахимаар байр сууриа илэрхийлээд эхэлсэн. Энэ жилийн хаврын улс төр “халах” нэг том шалтгаан нь мэдээж Ерөнхийлөгчийн санаачилсан хуулийн төсөл. Улс төр сонирхолтой болохын хэрээр Ерөнхийлөгчийн санаачилсан хуулийг эсэргүүцэгсэд ч дуу нэгтэй дуугарч эхлэх нь тодорхой болчихоод байгаа. Ялангуяа Л.Оюун-Эрдэнэ, Д.Амарбаясгалан, С.Амарсайхан нарын фракцынхан буюу МАН-ын залуу гишүүд Ерөнхийлөгчийн эсрэг эрслэн босож мэдэхээр байна гэх. Тэр дундаа Л.Оюун-Эрдэнийн фракцынхан гэгддэг Э.Болормаа, Г.Лувсанжамц, О.Батнайрамдал, Х.Булгантуяа, Ч.Номин, Д.Амарбаясгалангийн фракц болох Л.Мөнхбаатар, Н.Алтаншагай, О.Саранчулуун, Ж.Ганбаатар, Ж.Бат-Эрдэнэ, Ц.Сандаг-Очир, С.Амарсайханы фракцын залуу гишүүд болох М.Ганхүлэг, М.Сарнай, Ш.Бямбасүрэн, Г.Уянгахишиг тэргүүтэй гишүүд хүчээ нэгтгэж, дуу нэгтэйгээр Ерөнхийлөгчийн эсрэг хаврын чуулганд орж ирэх нь тодорхой болчихоод байгаа. 

ЕРӨНХИЙЛӨГЧИЙН ХУУЛЬ БАТЛАГДВАЛ ЯМАР ГИШҮҮД ХАМГИЙН ТҮРҮҮНД ЭГҮҮЛЭН ТАТАГДАХ ВЭ

      Ямартай ч өмнө нь Ерөнхийлөгчийн санаачилсан хууль ямар нэгэн хоригийг нь УИХ дор нь баталчихдаг байлаа. Гэтэл энэ удаагийн хууль нь нэлээн хольхуулах янзтай. Хаврын чуулган эхэлмэгц Ерөнхийлөгчийн санаачлан УИХ-д өргөн мэдүүлсэн УИХ-ын гишүүнийг эгүүлэн татах хуулийн төслийг нэн яаралтай горимоор хэлэлцүүлэхээ мэдэгдсэн. Тиймээс энэ хугацаанд Ерөнхийлөгч өөрийнхөө фракцийнхныг гадаад, дотоодын томилолтод явуулахгүй, бүрэн бүрэлдэхүүнээр нь чуулганд суулгана гэх яриа гарсан. Ерөнхийлөгчийн хууль батлагдвал удаа дараа ёс зүйн алдаа гаргасан, эрх мэдэл, албан тушаал бүрэн эрх нь хөндөгдөж мэдэх олон гишүүн бий. Тэр дундаа Ерөнхийлөгчид өнөөдрийг үнэнчээр хандаж, тал засаж өдийг хүрсэн гишүүд ч бий. Тиймээс Ерөнхийлөгчийн санаачилсан хуулийн төсөл УИХ-ын гишүүдийг талцуулж, хэн нь хэн бэ гэдгийг ялгаж байна ч гэж болмоор. Хамгийн гол нь Ерөнхийлөгчийн санаачилсан хууль батлагдвал МАН-ын УИХ-ыг гурав, Ерөнхийлөгчийн сонгуульд дараалан ялалт байгуулахад намын гал тогоог барьж байсан Д.Амарбаясгалан хүртэл эвгүйтэхээр болчихоод байгаа. Хамгийн сүүлд гэхэд МАН-ын дарга Н.Учрал түүнийг намын гишүүнчлэлээс чөлөөлнө гэдгээ мэдэгдсэн. Мөн төрийн эрхийг хууль бусаар авах хэрэгт нэр нь холбогдсон Х.Булгантуяа, хууль зөрчиж УИХ-ын гишүүн болсон гэгддэг дуулианы эзэн Э.Болормаа, Хөгжлийн банкны хэрэгт холбогдсон Н.Алтанхуяг, албан тушаалын байдлаа урвуулан ашиглаж, хөрөнгөө нуусан байж болзошгүй хэргээр АТГ шалгагдсан С.Ганбаатар, албан тушаалын байдлаа урвуулан ашиглаж, бусдад давуу эрх олгосон гэгдэх Х.Тэмүүжин, Хөгжлийн банкны хэрэгт нэр нь холбогдсон Д.Цогтбаатар, ёс зүйгүй үйлдэл удаа дараа гаргасан М.Нара-Нарантуяа, Ц.Мөнхцэцэг нар хамгийн түрүүнд яригдаж мэдэхээр байна.

  Ерөнхийлөгчийн санаачилсан хуулийн төсөлд:

-Гишүүн өргөсөн тангаргаасаа няцсан

-Гишүүний ёс зүйн дүрмийг ноцтой болон удаа дараа зөрчсөн,

-Гэмт хэрэг үйлдсэн болох нь шүүхийн эцсийн шийдвэрээр тогтоогдсон бол УИХ-ын Ёс зүйн дэд хороо, УИХ-ын нэгдсэн чуулганаар заавал нээлттэй хэлэлцэж, Үндсэн хуулийн Цэцийн шийдвэрээр эгүүлэн татах

-УИХ-ын гишүүн УИХ-ын ээлжит чуулганы хуралдааны 70-аас доошгүй хувьд хүрэлцэн ирсэн, ээлжит чуулганы санал хураалтын 70-аас доошгүй хувьд биечлэн оролцсон байх

-Монгол Улсын Их Хурлын тухай хуулийн 7 дугаар зүйлийн 7.2 дахь хэсгийн “ашиг сонирхлын зөрчлөөс ангид байж,” гэсний дараа “ёс зүйн хэм хэмжээг чандлан сахиж,” хэмээн нэмж тусгасан байна.