Хүний эрхийн үндэсний комисс, Жендерийн үндэсний хороо, “Гэрэл” медиа групп, “Зөвийг шүгэлдэгчид” ТББ хамтран “Баяр уу, эрх үү” нөлөөллийн аяныг эхлүүллээ. Тус аяны нээлт өчигдөр Төрийн ордонд болж, “1000 эмэгтэйн мянган амьдрал” хэлэлцүүлгийг зохион байгууллаа.

     Тус хэлэлцүүлгийн гол зорилго нь хүний эрхийн зөрчлийг арилгах, хэвшмэл буруу ойлголтыг өөрчлөх, хүн бүрийг хүйсээр нь бус чадвар, сонголт, үнэ цэнээр нь үнэлэх хандлагыг төлөвшүүлж, нийгэм, соёлын орчныг бүрдүүлэхийг оршжээ. Ийм ч учраас зохион байгуулагчид эмэгтэйчүүдийн эрхийн зөрчлийн талаар урьдчилан судалж, статистик мэдээлэлд тулгуурлан өөрчлөлт хийх шаардлагатай байгааг хэлэлцүүлгийн үеэр танилцууллаа. Тодруулбал, эмэгтэйчүүдийн эрх зөрчигдөх шалтгаан нь нийгмийн хандлага, эдийн засгийн бүтэц, институцийн зохион байгуулалт, эрх мэдлийн хуваарилалт гэхчлэн олон зүйлээс үүдэж байгааг хэлэлцүүлгээр танилцуулсан юм. 

      “Хэвшмэл ойлголтоо өөрчилье” уриатай “1000 эмэгтэйн мянган амьдрал” хэлэлцүүлэгт нийслэл, орон нутгийн 1000 орчим эмэгтэй оролцлоо. Тус хэлэлцүүлэгт УИХ-ын 126 гишүүнийг урьсан ч УИХ-ын гишүүн Г.Хосбаяраас бусад нь оролцсонгүй. Зохион байгуулагчид болон хэлэлцүүлэгт оролцсон эмэгтэйчүүдийн зүгээс бодлогын түвшинд өөрчлөлт хийх шаардлагатайг шаардсан ч УИХ-ын гишүүд тэр дундаа эмэгтэй гишүүд оролцолгүй, хойрго хандаж байгаад шүүмжлэлтэй хандлаа. Тодруулбал, эмэгтэйчүүдийн эрхийг хөндсөн хэлэлцүүлэгт ганцхан эрэгтэй гишүүн оролцлоо гэсэн үг. 

     Эмэгтэйчүүдийн талаарх хэвшмэл ойлголт нь зөвхөн хувь хүнийг бус, нийгмийн хөгжлийг бүхэлд нь хязгаарладаг. Монгол эмэгтэйчүүд өнөөдөр хүн амын 51.3 хувийг бүрдүүлж, дээд боловсролтой иргэдийн 60 орчим хувийг эзэлж, ажиллах хүчний оролцооны түвшнээрээ дэлхийн дунджаас өндөр үзүүлэлттэй байгаа ч энэхүү давуу байдал нь бодит эрх мэдэл, эдийн засгийн өгөөж болон бүрэн хөрвөж чадахгүй хэвээр байна гэдгийг мөн тодотголоо.

“Баяр уу, эрх үү” аян нь “Эмэгтэйчүүдийн эрхийн асуудлаарх агуулгын шинжилгээ, чанарын судалгаа”-ны үр дүнг олон нийтэд ойлгомжтой хэлбэрээр түгээх,

 Үндэсний хэмжээний 30 хоногийн нөлөөллийн кампанит ажлыг зохион байгуулах,

 Эмэгтэйчүүдийн эрх, тулгамдсан асуудал болон хэвшмэл ойлголтуудыг засах талаар олон нийтийн оролцоог нэмэгдүүлэх чиглэлээр цаашид үргэлжилнэ.