АРДЧИЛСАН НАМ УИХ-ЫН 2024 ОНЫ СОНГУУЛЬД ОРОЛЦОХ ХҮСЭЛТЭЭ СЕХ-НД ХҮРГЭЛЭЭ

2024-04-28, 877

Сонгуулийн тухай хуульд заасны дагуу Ардчилсан нам УИХ-ын 2024 оны сонгуульд оролцохоо өнөөдөр Сонгуулийн ерөнхий хороонд илэрхийллээ. Тус намын Үндэсний бодлогын хороо өчигдөр ээлжит бусаар хуралдаж, дээрх сонгуульд оролцох шийдвэрийг гаргасан юм. Хуульд зааснаар ирэх зургадугаар сарын 28-нд товлогдсон УИХ-ын сонгуульд оролцох нам, эвслийн хүсэлтийг Сонгуулийн ерөнхий хороо дөрөвдүгээр сарын 26-наас эхлэн хүлээн авч эхэлсэн бөгөөд өнөөдөр 00:00 цаг хүртэл хүсэдт хүлээн авах байна.

Одоогийн байдлаар 13 нам, нэг эвсэл УИХ-ын сонгуульд оролцохоо мэдэгдээд байна. Тухайлбал, ХҮН нам /ХҮН/, Монголын Либерал нам /МЛН/, Монголын Либерал Ардчилсан нам /МоЛАН/, Иргэний хөдөлгөөний нам /ИХН/, Ардчилал шинэчлэлийн нам, Гэр хороолол хөгжлийн нам /ГХХН/, Эх орончдын нэгдсэн нам /ЭОНН/, Иргэдийн Оролцооны Нэгдэл Нам /ИОНН/, Үндэсний эвсэл /МНН-МҮАН/, Их эв нам /ИЭН/, Иргэний зориг ногоон нам /ИЗНН/, Ард түмний олонхийн засаглал нам /АТОЗН/, Бүгд найрамдах нам /БНН/-ын удирдлагууд УИХ-ын 2024 оны ээлжит сонгуульд оролцох хүсэлтээ өгсөн байна.

Сонгуулийн ерөнхий хорооны 2024 оны 22 дугаар тогтоолоор байгуулагдсан Ажлын хэсэг УИХ-ын 2024 оны ээлжит сонгуульд оролцох нам, эвслийн баримт бичгийг хүлээн авч, нягтлан шалгаад Сонгуулийн ерөнхий хорооны хуралдаанд танилцуулах юм. УИХ-ын сонгуулийн тухай хуулийн 28 дугаар зүйлийн 28.2 дахь хэсэгт зааснаар Сонгуулийн ерөнхий хороо баримт бичгийг хүлээн авснаас хойш тав хоногт багтаан сонгуульд оролцох нам, эвслийг бүртгэх эсэх тухай шийдвэр гаргана.

АРДЧИЛСАН НАМ УИХ-ЫН 2024 ОНЫ СОНГУУЛЬД ОРОЛЦОХ ХҮСЭЛТЭЭ СЕХ-НД ХҮРГЭЛЭЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.