САНАЛ ГОРЬДОГСОД БА ХУДАЛ АМЛАЛТУУД 

      Сонгуулиар санал горьдсон улстөрчдийн юу ярих, юу ярихгүйг иргэд сайн мэдэж байгаа. Ганц санал илүү авахын тулд юу ч хийж, юу ч ярихаас буцахгүй гарамгай худалчуудын цаг тун ойртож байна. Тэд малчидтай уулзахдаа “Ноос, ноолуурыг үнэтэй болгоно. Махны цех, газрын тос боловсруулах үйлдвэр барина. Гурил, будааны үнийг бууруулна” гэдэг бол хотынход “Утаагүй, түгжрэлгүй, айдасгүй нийслэл бий болгоно. Монгол Улсаа хөгжүүлнэ, цэцэглүүлнэ” хэмээн амыг нь таглаж, хэнэг ч үгүй худал ярьсаар ирсэн.

      Гэтэл бодит байдал дээр цалингүй малчид үнэд хүрдэггүй малынхаа түүхий эд, арьс, нэхий, өлөн, цувдааг хогийн цэг дээр хаяхаас өөр аргагүйд хүрч, олсон хэдийгээ түлш, шатахуунд өгөөд дуусдаг. Харин хотынхон жил бүр түгжрэл, утаан дунд амьдарч байна. Монгол Улсын нийслэл зундаа үерт автаж, өвөлдөө сайжруулсан шахмал түлшинд угаартаж үхсээр байна. “Утаагүй болгоно” гэсэн ч эсрэгээрээ гэр бүлээр нь, хоногт хэдээр нь ч хамаагүй үхэлд хүргэдэг үхлийн түлш түлшээр монголчууд хэдэн өвлийг давж байна. Нефт, мах, арь, ширний үйлдвэр барих нь битгий хэл Дарханы зам буюу хот хоорондын ганцхан зам засварлачихаж чадахгүй байгаагаас Монголын улстөрчид ямар арчаагүй, хүнийрхүү ханддагийг нь харж болно. Товчхондоо, энэ жилийн сонгуулиар ялсан улстөрчид утаагүй, түгжрэлгүй хотыг өөрчилж чадахгүй. Өөрөөр хэлбэл, хотын иргэдийг стресс, бухимдалтай, нийгмийн асуудалтай байлгах нь эрх баригчдын бас нэгэн том зорилго гэх. Тийм болохоор энэ жилийн нэр дэвшигчдийг иргэд арай өөр шалгуураар сонгож, ганц ч болтугай дорвитой ажил хийчих хүнийг төрд гаргах нь чухал болоод байна. 

УИХ-Д ГУРВААС ОЛОН СОНГОГДСОН ГИШҮҮДЭЭС ТАТГАЛЗЪЯ, МАН-ЫНХАН 

     Олон жил УИХ-д суусныхаа хэргийг гаргадаг, улс орноо хөгжүүлж, иргэдээ амар тайван амьдруулж чаддаг бол тэднийг ад үзэх хэрэг алга. Улс төрд угжрах тусмаа сэтгэл нь цадахгүй, улсаа тонодог “хулгай”, “дээрэмчид” багасахгүй нь харамсалтай. Тиймээс уль доль болтлоо сонгогдож, улс төрд удаан суусан УИХ-ын гишүүдээс бүрэн мөсөн татгалзах нь зөв. Ч.Хүрэлбаатар, Н.Энхболд, Г.Занданшатар, Х.Баделхан, Б.Бат-Эрдэнэ, Д.Тогтохсүрэн, С.Чинзориг гээд олон хүн бий. Тэд энэ удаагийн сонгуулиар мөн л “Биднийг одоо л сонгочих юм бол Монгол Улсаа хөгжүүлэх гээд байна. Улс эх орон хөгжлийнхөө гараан дээр байгаа” хэмээн улиг болсон худал амлалтуудаа хөгшчүүлд итгүүлж байх жишээний. Ерөнхийлөгч У.Хүрэлсүх 2022 оны шинэ жилийн мэндчилгээ дэвшүүлэхдээ “Монгол улс хөгжил, дэвшлийнхээ гараан дээр зогсож байна” хэмээж байсан. Тэр үг санал горьдсон хэдэн гишүүнд үнэтэй, амьтай хэвээр байна. Өнгөрсөн хугацаанд “Монгол улсаа хөгжүүлнэ” гэж сонгогдсон гишүүд юу хийсэн бэ.