Засгийн газрын ээлжит хуралдаанаар 40 гаруй асуудлыг шийдвэрлэсэн. Энэ үеэр "Ачит Ихт" ХХК-тай холбоотойгоор Ажлын хэсэг байгуулж, жил гаруй хугацаанд ажилласан. Өнөөдөр дүнгээ танилцуулж, Засгийн газрын зүгээс "Эрдэнэт" үйлдвэрт тодорхой чиглэлүүд өглөө.

     Нэгдүгээрт, "Ачит Ихт" ХХК-ийн 34 хувийг "Эрдэнэт" үйлдвэр эзэмших 2014 онд байгуулсан гэрээгээ биелүүлэх үүрэг чиглэлийг өгсөн. "Ачит Ихт" ХХК 2003 онд байгуулагдаж, 2009 онд хувь эзэмшигч нар нь өөрчлөгдөж, 2013 онд "Эрдэнэт" үйлдвэртэй гэрээ байгуулж, овоолго ашиглах нөхцөл үүссэн байдаг. 2014 онд байгуулсан гэрээгээр 34 хувийг нь "Эрдэнэт" үйлдвэр эзэмшихээр гарч байсан. 2015 онд "Эрдэнэт" үйлдвэрээс гарсан Ажлын хэсэг уг гэрээг дүгнэж, "Эрдэнэт" үйлдвэрт ашиггүй учир эзэмшлээсээ татгалзах нь зүйтэй гэдэг шийдвэр гарсан байдаг. Иймд уг шийдвэрийг хүчингүй болгож, шийдвэр гаргаж байсан албан тушаалтнуудыг хууль хяналтын байгууллагаар шалгуулах нь зүйтэй гэж үзсэн. Өнгөрсөн найман жилийн хугацаанд "Ачит Ихт" ХХК-д 535 сая ам.доллар орчим борлуулалтын гэрээг хийсэн байдаг. Үүсмэл ордыг бий болгоход "Эрдэнэт" үйлдвэр 500 орчим сая ам.долларыг зарцуулж бий болгосон. Олсон орлогийн тодорхой хувь нь "Эрдэнэт" үйлдвэрт очих ёстой. Хоёрдугаарт, 34 хувьд дүйцэх орлогыг нэхэмжлэх нь зүйтэй гэдгийг "Эрдэнэт" үйлдвэрт даалгалаа. Гуравдугаарт, 500 орчим сая ам.долларыг зарж, "Ачит Ихт" ХХК-ийн үүсмэл орд "Эрдэнэт" үйлдвэрийн өмч байх ёстой. "Ачит Ихт"ХХК өмчлөөд байгаа овоолго "Эрдэнэт" үйлдвэрийн 100 хувийн орлого байх ёстой. Энэ чиглэл дээр "Эрдэнэт" үйлдвэрийг судлаад холбогдох шийдвэр гаргах үүрэг өгсөн” гэв.