Эмийн үнийн өсөлтийг хянан шалгах Түр хорооны нотлох баримтыг шинжлэн судлах сонсгол үргэлжилж байна. Сонсголоор Түр хорооны гишүүд шинжээчдээс асуулт асууж, хариулт авч байна.

УИХ-ЫН ГИШҮҮН Ц.ТУВААН: ДОХ-той холбоотой хэдэн нэр төрлийн эм байдаг вэ. Ямар стандарт мөрдөх шаардлага байгаа вэ.

ГЭРЧ: Би ХӨСҮТ-ийн ДОХ  бэлгийн замаар дамжих халдварт өвчний тандалт судалгааны албаны дарга Ж.Даваалхам гэдэг хүн байна. Гэхдээ өнөөдөр би халдварт өвчтэй түүнээсээ болоод ялгаварлан гадуурхалтад өртдөг, ил гарах боломжгүй хүмүүсийн төлөөлөл болж гэрчээр орж байгаа гэж бодож байна. Мөн ДОХ-оос урьдчилан сэргийлэх эрүүл хүмүүсийн төлөөлөл болж дуудагдсан байх. ДОХ бол урьдчилан сэргийлэх боломжтой эмчилгээтэй халдварт өвчин. ДОХ-ын халдвар авсан иргэд эмээ уугаад явбал хэд ч наслах боломжтой болсон. Энэ эмийг 2003 оноос нийлүүлж эхэлсэн. 2013 оноос Засгийн газар нийлүүлэх болсон. Глобол сан Монгол Улсыг ДОХ-ын сайн тогтоон барьж байгаа учраас Засгийн газар руу шилжүүлэх чиглэл өгсөн. Улмаар Засгийн газарт энэ эмийг нийлүүлэх хүсэлт эм ханган нийлүүлэгч компани руу тавьсан. гэтэл нэг ч байгууллага хариу өгөөгүй. Олон улсын байгууллагад хандаж, НҮБ-ын Хүүхдийн байгууллагаас ханган нийлүүлж, Засгийн газар бүрэн санхүүжүүлж байна. Сүүлийн жилүүдэд энэ эмийг хуулийн дагуу бүртгэлжүүлэх, зайлшгүй шаардлагатай эмийн жагсаалтад оруулах асуудал үүсээд байна.