Орхон аймгийн Засаг даргын орлогч М.Түмэнжаргалыг туслах ажилтандаа бэлгийн дарамт үзүүлсэн гэх мэдээлэл олон нийтийн сүлжээнд цацагдаад байна.

Энэ талаар бид М.Түмэнжаргалаас тодрууллаа.

-Тантай холбоотой мэдээлэл цахим сүлжээнд цацагдаад байна. Энэ талаар та мэдсэн үү?  

       -Хэдхэн минутын өмнө харлаа. Ийм худал мэдээллийг хэн гаргасныг мэдэж байгаа. Туслах ажилтандаа бэлгийн дарамт үзүүлдэг хүн би биш. Иймд ташаа мэдээлэл гэдгийг албан ёсоор мэдэгдэж байна. Улс төрийн зохион байгуулалттай л хэрэг болов уу. Өмнө нь бас намайг ингэж бичиж байсан.

-Улс төрийн захиалгатай гэхээр?

        -Орхон аймгийн Засаг дарга ажлаа өгөөд, би орлож ажиллаж байгаа юм. Энэ сарын 18-нд Орхон аймгийн Засаг даргыг томилох асуудал яригдаж байгаа. Түүнээс өмнө миний нэр төрийг унагах, худал мэдээлэл тараах ажил явагдаж байгаа бололтой. Би өчнөөн ингэж бичүүлээд батлагдахгүй. Харин ажлаа хийгээд сууж байгаа туслах эмэгтэйд маань л хэцүү байна.

-Туслах тань ажлаа хийж байгаа юу?

          -Тийм ээ, хийлгүй яах вэ. Өөрөө харчихаад над руу залгасан. Би Улаанбаатар хотод ажлаар явж байна. Над руу сандраад залгаж байна лээ. Эмэгтэй хүнд л хэцүү юм даа. Манай туслах ганц охинтой, охинд нь ч эвгүй санагдана шүү дээ. Нэг зүйлийг хэлэхэд, улс төр хийхдээ гэмгүй ажлаа хийж байгаа эмэгтэй хүнийг гүтгэж, гүжирдэх хэрэггүй. Ийм бохир улс төр хийх хэрэггүй гэж хэлмээр байна.