Улсын онцгой комисс цаг үеийн асуудлаар мэдээлэл хийлээ. УОК-ын нарийн бичгийн дарга Т.Баярхүү энэ талаар дараах байр суурийг илэрхийллээ.

Тэрбээр “Энэ жилийн хувьд өвөлжилт хүндэрч, малын хорогдол их гарсан. Энэ байдал одооноос л дээрдэж, зудын эрсдэлээс салж байна. Хаваржилтын эрсдэлээс сэргийлэхээр Монгол Улсын засгийн газраас холбогдох арга хэмжээг авч хэрэгжүүлэн ажиллаж байна. 2024 оны дөрөвдүгээр сарын 12-ны байдлаар нийт нутаг дэвсгэрийн 10 орчим хувь нь цастай, 90 орчим хувь насгүй болсон. Цасгүй болж байгаатай холбоотойгоор зудтай аймгуудын тоо буурч байгаа. Өнөөдрийн байдлаар 6.6 сая мал хорогдсон байна. Үүнээс 1.6 сая нь Сүхбаатар аймагт хорогдсон байна. Үүнээс шар усны дуудлага мэдээлэл өнгөрсөн хугацаанд Хөвсгөл аймгийн Ренчинлхүмбэ суманд мэдэгдсэн. Тиймээс суваг татах ажиллагааг шуурхай авч ажилласан байна. Мөн малчин өрхүүдэд өвс, тэжээлийн болон хүнсний тусламж үйлчилгээг хүргэсэн. Малаа алдсан иргэдийг малжуулах хөтөлбөрт хамруулах, хор уршгийг арилгах тал дээр ажиллаж байгаа. Мөн дулаарч байгаатай уялдан гал түймрийн аюул гарч байна. Тухайлбал, “Булган аймгийн Дашинчилэн сумын Хараат багийн “Шийр” гэдэг газар дөрөвдүгээр сарын 11-ний 12:46 цагт гарсан хээрийн түймрийн дуудлагаар Онцгой байдлын газрын Дашинчилэн сум дахь Эрэн хайх, аврах бүлгийн алба хаагчид, Дашинчилэн сумын Засаг даргын Тамгын газрын ажилтнууд, орон нутгийн иргэд ажиллаж, 15:20 цагт унтраасан” гэлээ.