УИХ-ын нэгдсэн чуулганаар Үндэсний баялагийн сан болон хамт өргөн мэдүүлсэн хуулийн төслийг хэлэлцэх асуудлыг хэлэлцэж байна.

      Энэ үеэр УИХ-ын гишүүн Ж.Сүхбаатар “Хамгийн гол зүйл нь сангийн хөрөнгийн тогтвортой байдал гээд байгаа юм. 13 жилийн өмнө намайг гишүүн байхад бид Тогтворжуулалтын сангийн хуулийг батлаад мөрдсөн. Дараа нь хуульд нь янз бүрийн байдлаар өөрчлөлт хийгээд элдэв янзаар нэр өгөөд хөрөнгийг нь ашиглаад байна гэсэн шүүмжлэл гарсан. Хуулийг ердийн зарчмаар хурдан өөрчлөөд байдаг. Үндэсний баялагийн сангийн хууль бол маш чухал хууль. Яг нэг органик хуулийн шинжтэй. Хуулийн тогтвортой байдлыг яаж хангах вэ гэдэг асуудалд хэрхэн хандаж байна. Гол нь эх үүсвэр. Хуримтлалын сан одоогийн хүмүүст их чухал анхаарал татсан асуудал. Эрүүл мэнд, боловсрол, орон сууцны асуудал хангана гэдэгт эх үүсвэр нь төрийн эзэмшилд ногдох ноогдол ашиг гэсэн байгаа юм. Бид бол хоосон яриагүй. Энэ засаг, энэ УИХ-ын үед өнөөдөр гэхэд 256 мянган төгрөг 1072 хувьцаатай хүмүүст ногдол ашиг нь орж байна.  Гэхдээ манай төрийн өмчит компаниудын ихэнх нь ашиггүй ажилладаг. Энэ хуулийг дагалдаад төрийн өчит компаниуд ашигтай ажиллах хэрэгтэй болно. Ашигтай ажиллаж байж хуримтлалын сан хэд гуравхан компанийн үүсвэртэй биш, илүү арвижиж байж иргэд эрүүл мэнд, боловсрол, орон сууцны асуудлаа шийдэх боломж гарц нээгдэнэ. Энд  Төрийн болон орон нутгийн өмчит хуулийнхаа философийг өөрчлөх ёстой. Энэ бол Баялагийн сангийн хуулийн чухал хэсэг юм” гэв.