"Ногоон автбус"-ны гэх хэрэгт яллагдагчаар татагдан шалгуулж буй УИХ-ын гишүүн Ж.Сүхбаатараас цаг үеийн асуудлаар дараах тодруулгыг авлаа.

-Таныг ногоон автобусны хэргээр яллагдагчаар татан шалгаж байгаа. Шүүхэд шилжсэн үү?

-Хэрэг прокуророос шүүхэд шилжсэн. Хэргийн талаар би хэвлэл мэдээллийн хэрэгслээр хамаагүй ярьж болохгүй.

-"Ногоон автобус"-ны сонсголд та оролцох уу?

-Түр хороо байгуулагдаад хяналт шалгалт хийх шинжээчдээ томилж байгаа гэж ойлгож байгаа. Шинжээч материалаа бүрдүүлснийхээ дараа сонсголд гэрчээр дуудах хүмүүсээ тодорхой болгох байх. Журмаараа намайг дуудвал би очно. Харин энэ удаагийн сонсголын хүрээ ер нь хязгаарлагдмал болж байгаа гэж ойлгосон. Өөрөөр хэлбэл, тухайн сонсголоор сонгон шалгаруулалтын журам хэрхэн явсан гэх мэт асуудлыг хэлэлцэх юм билээ.

-Та хуулийн байгууллагад хэдэн удаа очиж мэдүүлэг өгсөн бэ?

-Энэ хэрэг шүүхэд шилжсэн. Шүүгч хэрэгтэй танилцаж байгаа гэсэн үг. Эхлээд гэрчээр мэдүүлэг авч, дараа нь яллагдагчаар татсан. 

-Ногоон автобус хаана байгаа талаар та хариулт өгөх боломжтой юу?

-Ногоон автобусны эхний 20 автобусыг бид хүлээж авсан. Одоо хэл ам үүсээд байгаа нь 80 автобус. Тухайн автобуснуудыг хүлээж аваагүй байхад нь нийгмийн анхааралд орчихсон. Одоо  байгаа 100 автобусны талаар хотын дарга мэдээлэл өгсөн. Энэ нь хэрэгт татагдсан Б.Ганхуягийн мэдэлд байгаа асуудал. Бид хохирол барагдуулах талаар ярьж байгаа гэж хэлсэн. 

-Тэгэхээр автобуснуудыг буцаасан гэсэн үг үү?

-Би мэдэхгүй. Би буцаадаг хүн нь биш. Би хууль бус зүйл хийчихсэн зүйл байхгүй. Тухайн үед 20 автобус хүлээж авахад нь намайг хууль бусаар үүрэг даалгавар өгч, хүлээж авсан гэх үндэслэлээр шалгаад байгаа юм. Гэтэл энэ талаарх нотлох баримт байхгүй. Би гэм буруугүй гэдгээ нотолно. Хэрэв би тэр 20 автобусыг хүлээж авсан бол дараагийн 80 автобусны хэргийг юу гэж илчлэх билээ.

-Та капитал засвар орсон гэдгийг нь мэдээгүй гэсэн үг үү?

-Капитал засвар орсон гэж тогтоосон гэж тогтоогоогүй. Шинжээчийн дүгнэлтээр 2023 онд үйлдвэрлэсэн байна. Үйлдвэрийн зарим зүйл нь техникийн үзүүлэлтэ хүрэхгүй байна гэж гарсан. Капитал засвар орсон гэдэг нь олон нийтийн хэрэгслээр гарсан мэдээлэл. Шинэ автобус байсан үгүйг шүүхээс тогтооно.

-Энэ хэргээс болоод та нэр дэвших боломжгүй байгаа. Ногоон автобусны хэрэг сөхөгдөөгүй бол та нэр дэвших байсан уу?

-Дэвшилгүй яах вэ. Би сайд болохоосоо өмнө ёс зүйн асуудлыг ярьдаг байсан. Сайд болоод ийм асуудалд орооцолдоно гэж яаж мэдэх вэ.