Ерөнхий сайд Л.Оюун-Эрдэнийн сэтгүүлч Б.Ганчимэгтэй хийсэн “Улаанбаатараас ярьж байна” нэвтрүүлэг өчигдрөөс телевизүүдээр цацагдаж эхэлсэн. Тэдний ярьсан С.Зоригийн хэрэгтэй холбоотой хэсгийг эшлэн хүргэж байна.

-С.Зоригийн хэрэг 30 жилийн турш монголчуудын зовлон болж байна. Хоолойд тээглэсэн яс шиг л байдаг?

      -Тухайн үед юу болж байсан бэ гэдэгтэй холбоотой материалуудыг логик дарааллаар нь гаргаж өгсөн гэсэн үг. Ямар ч улс төрийн нөлөөгүйгээр ажиллах боломжоор би хангана. Хэн нэгэн энэ хэрэгтэй холбоотой асуудлаар ямар нэгэн байдлаар нөлөөлөх гэж оролдвол надад шууд хэлээрэй. Би тэр хүнийг олон нийтэд зарлаж чадна гэдгийг Засгийн газрын хуралдаанаар хэлсэн. Тухайн үед эрх баригчдын том хагарал байсан нь хурлын бүх тэмдэглээр батлагддаг. Өмч хувьчлагдаж байсан үе шүү дээ. 1998 оны дөрөвдүгээр сарын 22-ны өдөр М.Энхсайхан Ерөнхий сайд огцорсон. Ингээд Ц.Элбэгдоржийн Засгийн газрын 23-ны өдөр байгуулагдаж, долдугаар сард огцорч байсан. Наймдугаар сард онцгой дэглэм тогтоож, "Эрдэнэт" үйлдвэрийн захирал Ш.Отгонбилэгийн оронд Д.Дорлигжавыг  томилсон. Тэгээд Да.Ганболдыг Ерөнхий сайдаар санал болгож эхэлсэн. Аравдугаар сарын 1-нд Ардчилсан холбоо эвслийн хурлаар Ерөнхий сайдаар С.Зоригийг томилох ерөнхий тов гарчихсан байсан. Аравдугаар сарын 2-ны цайны цагаар Эвлэлийн удирдлагийн түвшний томчууд цуглаж, С.Зоригийг дараагийн Ерөнхий сайд гэдгийг албан бусаар товлосон гэдгийг ярилцаж байсан. Гэтэл орой нь С.Зориг бусдад хорлогдсон байсан. Сүүлд нь, С.Зоригийг Т.Чимгээ, Б.Содномдаржаа гэх хоёр хүн алсан болчихоод байж байна.

-Та энэ хэргийг улс төрийн аллага гэж боддог юм уу?

    -Харин та өнөөдрийг хүртэл ахуйн аллага гэж бодож явдаг юм биш биз дээ.

-Би асууж байгаа шүү дээ?

    -С.Зориг яагаад заавал аравдугаар сарын 2-нд ахуйн байдлаар алагдах вэ гэдэг асуудал үүснэ. С.Зоригийн хэлж байсан үг, үйлдлээс нэг зүйл харагддаг. С.Зориг системийн авлигал руу орохоос хамгийн их айж байсан хүн. Тэрээр “Бид нийгмийн хагас зуун жилийн баялагыг буруу хувиарлах гээд байна” гэдэг асуудлыг ярьдаг байсан. Хоёрдугаарт, манай журмын нөхөд системийн авлигалд идэгдэж эхэлж байна. 30 жилийн хугацаанд нийслэлийн газар, өмч хувьчлал, баялагийн тэгш бус байдал бухимдалт нийгмийн суурь болсон буруу шийдвэрүүд байжээ гэдэг дүгнэлт рүү шилжчихээд байгаа.

-С.Зоригийн хэрэг сонгууль бүрд зэвсэг болж байдаг. Цоо шинэ хардмаар, сэрдхиймээр магадлал бий юү?

    -Би Ерөнхий сайд болчихоод гуравдугаар сарын 8-нд Т.Чимгээтэй уулзаж байсан. Тэр үеийг сонгуультай холбоотой гэж үзэх нь арай эрт шүү дээ. Хэрвээ Т.Чимгээ, Б.Содномдаржаа нар С.Зоригийг алаагүй бол яагаад энэ хоёр хүнийг гурван шатны шүүхээр алсан гэж үзэв гэдэг нь маш том хэмжээний логик бөгөөд хүний эрхийн асуудал. Хэний захиалгаар хэнд ашигтай учраас тэр хоёр хүнийг С.Зоригийг алсан хэмээн хуулийн байгууллага бүхэлдээ үзээд гурван шатны шүүхийн шийдвэр гарав. Буруугүй хүмүүсийг хуулийн байгууллага яагаад шүүхээр болов. Нэр төрийг нь яаж сэргээх вэ, дахин ийм асуудал гаргахгүй байхад яаж анхаарах вэ гэдгийг бодох ёстой.

-Хүний эрх, хууль зөрчсөн хэлмэгдүүлэлт явуулсан хэрэгт тухайн үеийн Тагнуулын Ерөнхий газрын дарга асан Б.Хурц ял эдэлсэн гэж үзэх үү эсвэл өршөөгдчихсөн юм уу. Одоо сонгуульд нэр дэвшихээр яригдаж байгаа биз дээ?

   -Шүүх гэм буруутайг нь тооцоод Ерөнхийлөгч асан Х.Баттулгын өршөөлөөр суллагдчихсан. С.Зоригийн хэргийг хаахын тулд яагаад зохиомол хэрэг үүсгэчихсэн юм бэ гэдгийг Б.Хурц болон зарим прокуроруудыг үнэнээ хэлэх өдөр ирэх байх гэдэгт итгэдэг. Би тэднийг огт буруутгадаггүй. Тэд “Мэдье, гүйцэтгэе” гэж байгаа хүмүүс. Х.Баттулга Ерөнхийлөгч ч гэсэн үнэнээ хэлэх байх.

Ц.Элбэгдорж Ерөнхийлөгч Х.Баттулга Ерөнхийлөгчид тамгаа гардуулж өгөхдөө “С.Зоригийн хэргийг битгий сөхөөрэй. Бусад бүх зүйл надтай хамаагүй” гэж хэлсэн байдаг

-С.Зоригийн хэрэгтэй холбоотойгоор тав, зургаан ажлын хэсэг тарсан?

    -Зургаан ажлын хэсэг тарсан. Яагаад тарав, хэн хэн томилогдов, хэн, хэн халагдав.

-Ц.Элбэгдоржийн Засгийн газрын үед тагнуул, цагдаагийн байгууллагын хамтарсан Ажлын хэсэг таван удаа тарсан байдаг?

   -Ц.Элбэгдоржийн Засгийн газрын сэдэл байсан. Яг энэ систем 2009 онд Ерөнхийлөгч болсноор дахин угсрагдсан. 1998 онд хийж чадаагүй зүйлээ тэр яг хийсэн. 2012 онд МАН-ыг хуваачихсан, шүүх дээр нэрийг нь өгөөд. Тэр шүүгчдийн нэр “Эрдэнийт”-ийн 49 болон С.Зоригийн хэрэг дээр байгаа шүүгчид яг адилхан.

-Эрдэнэтийн 49 хувийн хэрэг Зоригийн хэрэгтэй холбоотой гэж мэдэгдсэн байдаг?

   -Ерөнхий прокурор нь "Эрдэнэт"-ийн захирал байсан Д.Дорлигжав. Ц.Элбэгдоржийн дараа томилогдсон шүүгч нар, Б.Хурц гэсэн системээр хоёр намыг мөнхөд хяналтандаа авахыг хүссэн бүлэглэл үүссэн гэсэн үг. “Эрдэнэт”-ийн 49 хувьтай холбоотой асуудал шүүх дээр яагаад гацаад байна вэ гэдэг асуудлыг Ч.Сайханбилэг оргосон гэж тайлбарладаг. Гэтэл Ч.Сайханбилэг энэ шийдвэрийг гаргасан уу үгүй юү гэдэг асуудал хөндөгдөнө. Ч.Сайханбилэгийг нэг өдөр үнэнээ хэлэх байх гэж итгэдэг. Тухайн үед Н.Алтанхуягийн Засгийн газрыг унагаагаад Ч.Сайханбилэгийг гаргаж ирэх үед хийсэн Ц.Элбэгдоржийн тохироо энэ байсан.