Засгийн газрын хуралдаанаас гарсан шийдвэрүүдийг танилцууллаа.  Энэ үеэр Эрүүл мэндийн сайд С.Чинзориг  Элэгний Д вирусийн халдварын тархалт, эмчилгээ, оношилгооны өнөөгийн байдал, цаашид авах арга хэмжээний талаар мэдээлэл өглөө.

            Тэрбээр “ДЭМБ-аас зөвшөөрөгдсөн интерферон тариаг эмчилгээнд хэрэглэх эмнэлзүйн зааврыг нь гаргаад, худалдан авах ажлыг зохион байгуулах ажиллаж байна. Гэхдээ энэ тариаг тодорхой хэмжээний гаж нөлөө өндөртэй гэж үздэг учир элэгний Д вирустэй иргэдийн байгуулсан ТББ энэ эмчилгээ зөвшөөрөхгүй байгаа. Тиймээс интерферон тариа авах тендерийг төр түдгэлзүүлсэн.  Мөн Монгол Улсын иргэдийг Буриад Улсад элэгний Д вирусийн эмчилгээнд  хямдралтай үнээр эмчлүүлэх хэлэлцээр гарын үсэг зурах шатандаа явж байна.  

           Эрүүл мэндийн тухай хуульд халдварт өвчний эмчилгээний зардлыг төр хариуцна гэх заалт бий. Тийм учраас элэгний Д вирусийн эмчилгээний зардлыг төр хариуцах, шаардлагатай арга хэмжээг авах. Шаардлагатай санхүүжилтийг жил бүр улсын төсөвт суулгаж өгөх  чиглэл Засгийн газарт өгөх тогтоол гаргаж өгөөч гэсэн хүсэлтийг Байнгын хороонд хүргүүлээд байна.  Энэ жил улсын төсөвт “Элэг бүтэн Монгол” хөтөлбөрийн хүрээнд долоон тэрбум төгрөгийн төсөв Эрүүл мэндийн сайдын багцад туссан байгаа.  Одоогийн байдлаар 13 орчим тэрбум төгрөгийн санхүүгийн боломж Эрүүл мэндийн сайдын төсөвт байна. Энэ ондоо багтааж элэгний Д вирусийн эмчилгээг эхлүүлэх нь зүйтэй гэсэн чиглэлээр асуудлаа танилцуулж, Засгийн газрын гишүүд дэмжлээ. Мөн элэгний Д вирусийн эмчилгээг ойрын хугацаанд эхлүүлэх, шаардлагатай тохиолдолд эмийг гааль, нөат-аас чөлөөлөх талаар ирэх долоо хоногийн хуралдаанаар хэлэлцэхээр боллоо” гэлээ.